Umimmaat kisinnerini 149-nnaagaluartut piniarneqarsinnaalissasut
Nanortallip kangiani umimmannik kisitsisoqaqqammerpoq.
Umimmaat 19-it 2014-imi nuuneqartut maanna 149-nik amerlassuseqalersimasut, kisitsinerup takutippaa.
Kujataani umimmaat piniagaalissappata piniagaalinngikkallassappataluunniit aalajangiisussaq tassa amerlassusaasa ikinnerpaamik 150-inngorsimanissaat.
150-ilu anguneqarsimarpasippoq.
Naak kisitsinermi 149-innaagaaluartoq, Kommune Kujallermi inuussutissarsiornermi allatsi Sten Lund umimmaat kisinneqaqqammersut amerlassusaannut naammagisimaarinnippoq.
- Tassa taakkua 149-it naammaginarput.
Umimmak ataaseq toqungasoq
Nunali kisitsiffigineqartoq isorartummat qaqqartoqimmallu kisitsinermi takungitsuugaqartoqarsimasinnaanera mattunneqanngitsoq, Sten Lund oqarpoq:
- Maluginiarparput umimmak ataaseq aputip sisoorfiata nalaani toqungasoq tulukkat teriannissallu nerisimagaat. Aamma ilimagisinnaavarput arlaani takunngitsuugaqarsimasinnaalluta, taanna oqarpoq.
Umimmak toqungasoq ilanngukkaanni, tassa amerlassusaat 150-iusutut tagginneqarpoq.
- 150-inut inissikkaanni tassa assigiinarpaa.
Amerlanngitsunik piniartoqarsinnaassasoq
Umimmaat kisinneqarmata uumasoqatigiit ataatsimoortut qulit sinnillit, marlunniit 37-inut amerlassusillit, naammattoorneqartut, Sten Lund nassuiaavoq
Kisitsisoqarnerani Pinngortitaleriffimmi ilisimatooq siuttoralugu kisitsisoqarpoq. Amerlanngitsunillu piniartoqarsinnaassasoq Pinngortitaleriffimmiit taamaammat inassuteqaatigineqartoq, Sten Lund oqarpoq.
Taama pisoqannginnerani piareersagassat, soorlu umimmaat angutivissat arnavissallu amerlassusaat, qassinik ukioqarnersut, qanoq nerisasassaqartiginersut inissilluagassaassammata qaqugu piniagaalerumaarnersut maanna ullulerneqarsinnaangikkallarpoq.
- Aamma ukiut tallimakkaarlugit qulikkaarlugilluuniit tamakkiiisumik kisitsisarnissaq, tassa tamakkuupput piujuartitsinermi piniartitsinissamut tunngaviusussat.
Kujataanili qaqugu umimmanniartoqarsinnaalissanersoq, Kommune Kujallermi kommunalbestyrelsimi ilaasortat oqaluusereqqikkumaarpaat.
- Soorunami tamakkua siunnersuutugineqassapput politikkerinut, taakkua aalajangiisussaapput qanoq ingerlatsinissaq isikoqassanersoq.
Kujataani umimmanniartoqarsinnaalertinnagu piniarnissamut inatsisit kiisalu nakkutilliinermi suliassat aamma inissinneqaqqaasasut, Kommune Kujallermi inuussutissarsiornermi allatsi Sten Lund ilanngullugu nassuiaavoq.
