Umiatsiaararsortut qujaannarput
Naalakkersuisut Qeqertarsuup Tunuani umiatsiaararsorluni qaleralinnianut misileraaviit sapaatip akunnera kingullermi ilavaat. Taamaalilluni Ilulissat Qasigiannguillu avataani aamma misileraasoqarsinnaanngorlugu. Qaaleralinnialli tamatumunnga qujaannarput.
Umiatsiaararsorlutimmi qaleralinniat ukiarmat imarluttalermallu misileraavissatut innersuunneqartut Karl Lyberthimik septembarip tallimaani ataatsimeeqateqarnerminni atorunnaarsequsimagaluarpaat:
- Tassa Nuummiikkatta piumasarisimagaluarparput misileraavissatut innersuussat, aasaanerani atugassatut innersuussaammata, taakkua atorunnaarseqqullugit massakkut septembarimi, oktobarimi, novembarimi decembarimilu tamaani avasiinnarmi misileraasoqarsinnaanngimmat, Anthon Lindenhann, Sinerissap Qanittuani Aalisartut Piniartullu Kattuffianni siulittaasoq taama oqarpoq.
Qeqertarsuup Tunua maanna septembarip qiteqqunnerani ukiarluinnartoq, anorlerajussivoq mallerajussillunilu, aalisartullu siuttuat naapertorlugu imartat, Naalakkersuisut misiliilluni aalisarfigeqqusaat avasiartumiittut, isumannaatsumik aalisarfiusinnaajunnareerput.
Tassalu misileraatitut qaleralittassiissutigineqartut 700 tonsit qaammatini pingasuni tullinnguuttuni ulorianartorsiornani aalisarneqarsinnaajunnaareertut, aalisartut isumaqarput.
Taarsiullugu piumasaraat, 700 tonsit pineqartut sinerissamut qanittumi naliginnaasumik aalisarneqassasut.
Karl Lyberthili umiatsiaararsorlutik qaleralinniat kissaataat malillugit misileraavinnik ilasisimanerarpoq:
- SQAPK-minngaanniit isumaqarpunga suniarnerlutik paaseqqissaartariaqaraat. Oqarnittuut ullut arfineq pingasut matuma siorna ataatsimeeqatigivakka. Taakkualu kissaataat, taakkoqqissaat kissaataat malillugu misileraaffissatut siunnersuutit tiffasinnerusut akuersissutiginiarlugit oqarpunga. Aamma taakkua inuit nuannaarput paasinnikkama aamma tusarnaarsinnaangama nuannaarput qujallutillu anillutik, Aalisarnermut Naalakkersuisoq Karl Lyberth taama oqarpoq.
Umiatsiaararsorlutilli qaleralinniat Karl Lyberthimut tatiginnikkunnaavipput:
- Karl Lyberthi qanimut suleqatikkuminaattorujussuuvoq. Tatigisinnaanngilarput. Aamma qineqqusaarutit, neriorsuutit taama sakkortutigisutut timitalersorneqanngitsut isumaqarpunga piffissaq naammalersoq tatiginnikkunnaarnissatsinnut, Anthon Lindenhann oqarpoq.
Sinerissap Qanittuani Aalisartut Piniartullu Kattuffiat umiatsiaararsorlutik aalisartut atugaat pillugit akerliussutsimik takutitsiniarlutik pilersaarusiuleruttorput:
- Tassa una oqaatigiinnassavara assorujussuaq paatsuunganartikkakku Ilulissani aalisartut taamatut iliornerat.
Oqarnittuut Ilulissani aalisartut kissaataat maleqqissaarlugit Naalakkersuisut aalajangiivugut. Aamma Ilulissani aalisartut kissaataat maleqqissaarlugit uanga Naalakkersuisutut iliuuseqarpunga, Karl Lyberth oqarpoq.
