Umiatsiaaqqamik tilliffigitittoq ikiorpaat
Anni aamma Jens Glindorf Christensenikkut Najaaraq 1995-imili ilisarisimalerpaat, taamani Najaaraq aqqaneq marlunnik ukioqarluni aappariit taakku Roskildemut tikeraaqqaarmagilli. Najaaraq Anni aamma Jens Glindorf Christensen-ikkunnut ikioqquvoq illoqarfittut ikinngutigisamik ikiuussinnaaneranik qinnuiginnilluni.
Taanna ikioqqulluni qinnuiginninnermini ilaatigut ima allappoq:
"Ataataga novembarip pingajuanni 50-inik ukioqalissaaq. 14-inilli ukioqarluni piniarnermik aalisarnermillu inuussutissarsiuteqalerpoq. Angallatini inuunermini pisariaqartilluinnarpaa, taanna atorlugu pinngitsoorsinnaanngisani pissarsiarisaramigit. Kisianni patsiseqavilluni imaatigut angalaarsinnaajunnaarpoq.
- Angallatini aallarunneqarsimasoq oktobarip 13-ianni ullaakkut paasivaa, taannalu qerrut akornanni nanivaa mallinit sakkortuunit nunamut qaarsaritissimalluni sequmivissimasoq. Umiatsiani mallinit qaarsarineqarluni sequmikkiartuaartoq isiginnaaginnarsinnaavaa, tassami anorleqimmat qanoq iliortoqarsinnaanngilaq. Oktobarip 14-ianni politiit angallataata umiatsiap tikippaa. Umiatsiarli atorsinnaajunnaarsimavoq, soorlu motooria atorsinnaajunnaarsimalluni. Inuusuttuaqqallu umiatsiamik aallarussisimasut ajoraluartumik suli nanineqanngillat."
"Paniusutut pisussaasorivunga ataatama inuussutissarsiumminik aallartitseqqinnissaanut ikiuuttariaqarlunga. Iluatsissappat iluatsissanngippalluunniit. Misilittariaqarparali. Taamaattumik allaffigaassi neriullunga ataatannik tapersersuerusuttut amerlanerpaanngorniassammata, aalisartutut piniartutullu inuunerminik aallartitseqqinniassammat, angajoqqaama inuunerminni atugaat taamaalillutik allanngorpallaannginniassammata.
Piniartuunermik kulturip tammannginnissaa anguniarlugu, ataataga inuusuttunik ilinniartitsisarpoq upernaakkut natsersuit nalaanni kippaqateqartarluni. Ataatama puisip tamakkerluni atorneqarnissaa ilinniartitsissutigisarpaa. Appanniarneq ullumi oktobarip 15-ianni aallartippoq inuussutissanik akissarsiorfiulluartartoq piniariarsinnaanngilarli!"
Anni aamma Jens Glindorf Christensenikkut maanna bankkontomik ammaasimapput Roskildermiut allallu Najaaqqap angutaa ikiorniarlugu tassunga ikiseqqusillutik.
Aappariit aamma facebook-imi katersuiniarneq pillugu malinnaavigineqarsinnaasumik pilersitsisimapput. Akunnerit arlaqanngitsut matuma siorna 4.850 koruunit tunissutigineqarsimapput.
Katersuiniarnermut uunga ikisisoqarsinnaavoq: Bankkonto: 9173-4783854546 - Ikisigussi nalunaaqqutsissavarsi “Nanortalik”.
Katersuiniarnikkut umiatsiaaqqamik, motoorimik piniutillu pisisoqareerpat, katersorneqartut sinneri Annip Jens Glindorf Christensen-illu inuusuttunnguit marluk qanittukkut ajunaartut angajoqqaavinut tunniunniarpaat.
vet.
