Umiartortoq: Umiarsuit ilisimannittoqarlutik angalasariaqalerput

- Piffissanngorpoq piumasaqaataalertariaqarlunilu umiarsuit nunanit allaneersut, nunatta imartaani angalatillutik kalaallinik sumiissusersiorsinnaasunik ilisimannittoqartariaqartassallutik, MánassínguaK´ Noahsen, Imarsiornermik Ilinniarfimmi Paamiuniittumi pisortaq oqarpoq.

Umiarsuaq assartuut ”Vega Sagittarius” Liberiameersoq, Afrikap kitaanit, 17-nik inuttaqarluni Nuup avataani sisamanngormat ikkarlippoq. Umiarsuaq nunatta imartaanik ilisimannittoqarani angalavoq. Inuttat tassaapput Danmarkimeersoq ataaseq sinneri Filippinerineersuullutik.

- Ajorluinnartumik pisoqarsimassagaluarpoq ikkarlittoq ikummatissamik usisuusimappat ilaasortaassuusimagaluarpalluunniit. Umiarsuaq ikkarlukkami silarlunngilaq, Imarsiornermik Ilinniarfimmi pisortaq eqqarsarpasilluni oqarpoq, aperalunilu umiarsuup aquttarfiani sumiissusersiorterpassuit nutaaliaalluinnartut aqumiunit iluamik sooq atorneqarsimannginnersut, radarikkut søkortplotterikkullu ikkarluit sumiiffii takuneqarsinnaasarmata.

Sumiissusersiutinik nutaaliaalluinnartunik ullumikkut peqartoqaraluartoq, MánasinguaK´ Noahsen isumaqarpoq, nunatsinni imarsiornermik inatsisit sukaterneqartariaqartut.

- Nunatsinni uuliamik nassaartoqassagaluarpat umiarsuit amerlalluinnartut imartatsinni angalasalertussaassapput. Imarsiornermik inatsisit sukaterneqanngippata umiarsuit  ilisimasortaqaratik angalallutik ikkarlittut pinngortitamut ajorluinnartumik kinguneqartitsisalersinnaapput – innarleerujussuarlutik, Imarsiornermik Ilinniarfimmi pisortaq erseqqissaavoq.

Royal Arctic Linemi tusagassiisartoq Irene Jeppson KNR.gl-mut oqarpoq nunatta imartaani angalatilluni ilisimannittoqarnissamik piumasaqaateqartoqanngitsoq.