Umiarsuup naalagaa assaassuarnik kiggigussaalluni ajunaartoq

Umiarsuarmi ujaqqanik qalluissummi, Masik Sioqqami sulisut marluk septembarimi sioqqanik usiminnik usingiaaneranni ajunaartoqarpoq.
Allattoq Jens Betak
novembarip 08-at 2019 06:06

Umiarsuup Tasiilap avannaani nunaqarfimmi Kuummiuniinnerani umiarsuarmi inuttat umiarsuaq septembarip qulingiluaanni usingialeruttoraat ajunaartoqarpoq.

Imarsiornermi ajutoornerit pillugit ataatsimiititaliarsuup sulinermi ajutoortoqarneranut nalunaarusiaani tamanna inerniliunneqarpoq.

Usingiaaneq angutit marluk suliassaraat. Angutip ataatsip assaat umiarsuup qaani tunngaveqartoq aquppaa. Assaatip umiarsuup usilersortarfianit sioqqat lastbiilimut umiarsualivimmiittumut usilersuutigai.

Usingiagassat ikiliartorneranni assaatip nivaatartaarta sumut ingerlannissaa aquttumut takujuminaalliartortarpoq.

Taamaammat umiarsuup naalagaa umiarsuup qaani sumut ingerlatitsisoqassanersoq ilitsersuivoq.

Ullup-qeqqasioriartortoq

Lastbiili umiarsualivimmiittoq ulikkaarluni ingerlammat ullup-qeqqata eqqaraa.

Usingiaasut suliaminnik naammassingajalerput, assaatimillu aquttup usitik ullup-qeqqartinnagu naammasseqqaarusullugit.

En skitse af Masik Sioraq
En skitse af Masik Sioraq Assi © : Masik

Lastbiilip umiarsualivimmut uteqqinnissaanut utaqqineranni umiarsuarmi inuttat allat ikiartorput. Inuttat ikisut ullup-qeqqasioriartorput usingiaanermillu suliaqartut ullup-qeqqasioriartoqqullugit kallerisaarlugit.

Pisut akornanni lastbiili uteqqippoq, assaammillu aquttup assatassat kingulliit nammineq isumagiinnarniarlugit umiarsuup naalagaanut oqaatigaa.

Umiarsuullu naalagaa sumiiffimmit ingerlasoq takuaa, usingiagassallu kingulliit aallartillugit. Assaasoq naammasseriarami assaat inissippaa ullup-qeqqasioriartorniarlunilu, aquffimminiilli anillakkami umiarsuup naalagaa usilersorfiup matserfiata eqqaani nalasoq siumorpaa.

Aquttup umiarsuup naalagaa assaatip kingoraata matserfiullu akornanni kiggigussaasimasoq paasivaa ikiortussaminillu suaartalerluni. Inuttat ullup-qeqqasioriartorsimasut erngertumik anillapput iluatsinngitsumillu uummarsaagaluarlutik.

Imarsiornermi ajutoornerit pillugit ataatsimiititaliarsuup umiarsuarmi inuttat oqaloqatigineratigut pisoq tamaat misissuiffigaa.

Takusaqarsinnaarpiannginneq

Udsynet fra styrehuset i gravemaskinen
Udsynet fra styrehuset i gravemaskinen Assi © : Grønlands Politi

Umiarsuarmi inuttat assaatip aquttarfianit takusaqarniarnerup ajornakusoornera pissutigalugu assaatip eqqaaniinnissaq ulorianartoq ilisimavaat. Tamanna umiarsuup suliffittut naliliiffigineqarnera kiggigussaasoqaratarsinnaasoq aamma allassimavoq.

Assaatilli atorneqarnerani suliffiusup eqqaaniittoqannginnissaanut assersuuteqaraniluunniit sulisaatsimik ilitsersuuteqanngilaq.

Taamaammat assaaffigisassap inoqarnerani assaatip aallartinneqarnissaa ulorianarsinnaasoq imarsiornermi ajutoornerit pillugit ataatsimiititaliarsuup inerniliissutigaa. Tamannalu septembarip qulingiluaanni pivoq.

Umiarsuaq suliffeqarfimmit Masimmit pigineqarpoq. Umiarsuaatileqatigiiffiup pisut taamaattut siunissamut pinaveersaartinnissaannut qanoq suliniuteqarnissartik imarsiornermi ajutoornerit pillugit ataatsimiititaliarsuup nalunaarusiaani nassuiaatigaa.

- Maskiinaqarfiup ulorianartup eqqaata killilersorneqarnerata annertusinissaa kiggigussaasoqaratarsinnaaneranut kisimi pinaveersaartitsissutigisinnaallutigu maannamut aalajangerput, umiarsuaatileqatigiiffik nalunaarusiami allappoq.

Ulorianartutut killilersuineq annertusineqassaaq, taamaalilluni assaatip ingerlatinneqarnerani useqarfiup saaniittoqarnissaa siunissami inerteqqutaalissaaq.