Umiarsuit tunitsiviit aappaagu tikeqqissapput
Sumiiffimmi pineqartumi nunami tunitsivissat naammanngitsutut nalilerneqarpata, nunami tunisassiorfinnut oqilisaassinerinnarmut angallatit tunitsiviit atorneqassapput.
Akuersissuteqarneq angallatinit tunitsivinnit taamaallaat aalisarfiunerpaami, maajimiit aggustimut, nalunaarutigineqartassaaq, angallammilu tunisassiorfeqartunut tamanna piumasaqaataavoq.
Tunaartarisassat qeqqanut suluppaakkanullu aamma atuupput.
Nipisanut angallammik tunitsivimmik pilersitsiniaraanni, ingerlatseqatigiiffik qinnuteqartoq tunitsivimmik peqariissaaq, angallat Kalaallit Nunaanni nalunaarsorsimassaaq, angallallu tunitsivik tunisassiortoqarani angallassinerinnarmut atorneqassalluni.
Taavalu qaleralinnut tunngatillugu sinerissamut qanittumi qaleralinniarnermi angallatinik tunitsivinnik assartuutinillu atuinissaq sunaluunniit ataatsimut isigalugu mattunneqarpoq, nunamimi tunitsivissat naammattut nalilerneqarmat. Angallatinut tunitsivinnut aappaagu tunaartarisassat nutaat pillugit Aalisarnermut, Piniarnermut Nunalerinermullu Naalakkersuisoqarfik tusagassiuutinut taama allappoq.