Umiarsuit takornariartaatit tikittartut ikiliartortuarsinnarput
Visit Greenlandip umiarsuit ilaasumut ataatsimut Nunatta Karsianut akitsuutitut akiliutigisartaat Nunatsinnut takornariartitserusuttannginnerannut patsisaasoraat.
Kisianni aamma umiarsuit Issittup imartaani malittarissat suut malissaneraat nalornitsiseqataasimasoq aamma sunniuteqarsimasinnaasorineqarpoq.
Visit Greenlandip umiarsuit takornariartaatit 30-t Nunatsinnut ukiormanna tikinnissaat naatsorsuutigaa. Tassa ukiut sisamat matuma siornanut sanilliullugu qulinik ikinnerusut.
Umiarsuillu takornariartaatit tikittartut ikiliartorneri ilutigalugit ilaasut ikiliartorput, kisitsisimmi takutippaat 2010-miit 2013-imut umiarsuarni takornariartaatini ilaasut tikittartut 10.000-inik ikileriarsimasut:
- Isumaqarpugut tamanna arlalinnik pissuteqartoq. Tamaani Nunatsinni umiarsuarmi takornariartaatini ilaasunut ilaatigut qaffasissumik akitsuusiisaratta. Tassa ilaasoq ataaseq Nunatsinnut tikikkuni akitsuut 525 koruuni akilertussaammagu, Visit Greenlandimi pisortap tullia, Anders la Cour Vahl, oqarpoq.
Umiarsuaatileqatigiinnik nalornisitsisoqartoq
Kisianni umiarsuaatileqatigiit Nunatsinnut tikikkusuttannginnerannut ilaasunut akitsuusiisarneq kisimi peqqutaasorineqanngilaq:
- Imaani angallannermut sillimaniarnermullu malittarisassat oqallisaangaatsiarsimapput nalornisitsillutik.
Oqallinneq ukiuni arlalinni atuuppoq. Umiarsuuatileqatigiit akornanni oqalliffiungaatsiarsimalluni. Soorlu sumut angalasoqarsinnaanersoq, umiarsuit qanorittut angallatigineqassanersut qanorlu angalaneq ingerlanneqassanersoq. Tamakkua tamarmik umiarsuaatileqatigiit Nunatsinnut angalatitsinissaannut tunuarsimaartitsisimapput, Anders la Cour Vahl oqarpoq.
Naalakkersuisut suliniuteqarnerisigut siunissaq qaamanerulerpoq
Kisianni Naalagaaffiit Peqatigiit imarsiornermut suleqatigiiffiata, IMO-p, Issittup imartaani isumannaallisaanermut malittarisassanik, Polarkodenimik taaneqartunik, atuuttussanngortitsinera isumallualersitsivoq:
- Maannamiit umiarsuit takornariartaatit piareersimaffigikannilereersinnaavaat soqqusaanerlutik aammalu suut inerteqqutaanersut. Tamannalu aamma toqqammavigalugu umiarsuit takornariartaatit tikittarneri ineriartortinneqalersinnaapput, Anders la Cour Vahl, oqarpoq.
Taamaammat Visit Greenlandimit siunissaq aarlerinartinneqanngilaq. Naalakkersuisummi ilaasumut ataatsimut akitsuutip, 525 koruuniusup, appartinnisaanut aamma siunnersuuteqarnialersaarmata:
- Akitsuut taanna aaqqiivigineqarpat qularnarunnaarpallu Issittup imartaani takornarianik angallassinermi malittarisassat suut atorneqarniartut, taava umiarsuit takornariartaatit atorlugit takornariartitsisarneq inerisarneqalersinnaavoq. Taamaammat siunissaq qaamasutut isigivarput, Anders la Cour Vahl oqarpoq.
