Umiarsuit takornariartaatit Nunatsinnukartartut amerliartortut
Kisitsisit Kalaallit Nunaanni Naatsorsueqqissaartarfimmeersut tamanna takutippaa.
Takornariartaatinut siorna 2018-imi ilaasut, 2017-imut naleqqiullugu 46.000-ngajannik amerlisimapput, tassa 20 procentingajannik amerlisimallutik.
2014-imullu naleqqiullugu 126 procentinik amerlisimallutik.
Takornariartaatit 2018-imi tikittut katillutik 353-iupput, mannalu 2019-imi tikittut tikittussallu 75-inik amerlillutik katillutik 428-ujusussaasut nalunaarutigineqarluni.
Umiarsuit tikittartartut qanoq ittuuneri Naatsorsueqqissaartarfimmit aamma kisitsisaataatigineqarpoq, umiarsuillu tikittartut alliartortut tassani takuneqarsinnaavoq. Assersuutissaqqissoq tassaavoq umiarsuarujussuaq sineriatsinni angalaqqammersoq Caribbean Princess, 3000-it sinnerlugit ilaasoqarsinnaasoq, 1200-llu missaanni sulisulik.
Visit Greenlandip Arctic Expedition Cruise Association, AECO, aamma suleqatiginerulersimavaa. Umiarsuit minnerulaartut, tassa 300-t missaannik ilaasoqarsinnaasut, AECO-p takornariartitsisarnermini annerusumik atortarpai.
Umiarsuarnik mikinerusunik misilittakkat takutippaat inuiaqatigiit inuttunerusut inuiaqatigiinnut ikinnerusunik innuttalinnik aningaasanik isaatitsinerusarneq aamma takutippaat. Kalaallit Nunaanni Naatsorsueqqissartarfik taama nalunaaruteqarpoq.