Umiarsuit takornariartaaterpassuit isumannaallisaanikkut ernumanartortaqarput
Umiarsuit takornariartaatit amerligaluttuinnartut Kalaallit Nunaata sineriaani angalasartut ulorianartorsioraluttuinnartut, Bjarne Rasmussen isumaqarpoq.
- Umiarsuarnik takornariartaatinik aasakkut angalaneq ulorianarsinnaavoq, iluliarujussuimmi inissiarsuartut quleriittut angitigisut Kalaallit Nunaata sineriaata avannaanit kujataanut ingerlaartarput, taakkualu umiarsuarsuarnit takornariaqartaatinit aporuneqarneruik umiarsuit putuneqarsinnaapput, umiarsuimmi tamakkua ilai immami iluliarpassualimmi angalasinnaanissaannut sananeqarsimannginmata Bjarne Rasmussen, aviisimi Metroexpress-imi taama issuarneqarpoq.
Bjarne Rasmussen-ip taamatut aarlerisaaruteqarnera Danmark-imi umiarsuaatillit peqatigiffianni siunnersortimit taamatullu imaani angalanermi isumannaallisaanermik ilisimatuup-mit Hans Otto Kristensen-imit taperserneqarpoq.
Umiarsuit issittumi angalanissaminnut sananeqarsimanngitsut iluliarpassualimmi angalanissaat aarlerinartoqartillugu taana oqarpoq.
Imarsiornermik qullersaqarfimmi pisortap tullia Francis Zachariae oqarpoq, umiarsuit takornariartaatit issittup imartaani angalasinnaasut taamaattorli ulorianartuusoq Francis Zachariae aviisimi Metro Express-imi taama issuarneqarpoq.
- Malittarisassat sukaterneqassapput taakkualu maannakkut suliarineqaleruttorput. Francis Zacharia-ip ernumaginerpasai tassapput umiarsuarujussuit 4.000it tikillugit ilaasoqarsinnaasut, umiarsuillu tamakkua nunani kiattuni soorlu Caribiami immamilu akullersuarmi angalanissaanut nalequttunngorlugit sananeqarput.
