Umiarsuit Issittukkoortalernerisigut Kangianit Europamukarneq sivikillisinneqassasoq
2000-kkut qiteqqunneranni Issittumi imaatigut angallanneq ullumikkumut naleqqiullugu ukiup ilaani marloriaammik sivisunerusumik ingerlanneqarsinnaassaaq, tuluit ilisimatuut nalunaarusiami nutaami taama inerniliipput.
Kangianit Europamut imaatigut angallanneq taamaalilluni sapaatit-akunnerannik ataatsimik sivikillissaaq orsussamillu atuineq millissalluni. Umiarsuimmi Akullersuarmi Suezkanalimut angallaffioqisumut taarsiullugu ukiup ilaani Issittukkoorlutik toqqaannarnerusumik angalasinnaalissapput.
Silap pissusiata allanngoriartorneratigut silaannaap kissatsikkiartornera ilutigalugu, Issittup sikuerukkiartornera Qalasersuullu sikuata aakkiartornera umiarsuaatileqatigiiffiit taamaalillutik aningaasarsiornerminni atorluarsinnaavaat.
- Imaata aasaanerani sikusarnerata millinera, silap pissusiata allanngoriartorneranut takussutissat annersarigunarpaat, tamannalu aningaasarsiornermut pitsaasumik sunniuteqarsinnaavoq, doktor Nathanael Melia taama oqarpoq.
Taanna Tuluit Nunaanni Readingimi ilisimatusarfimmi ilisimatuut silap pissusiata allanngoriartorneranik misissuisut ilagaat, taassumalu Issittumi imaatigut siunissami angallanneq naatsorsuiffigisimavaa. Taanna nassuiaavoq umiarsuit ikitsuinnaat ullumikkut issittukkoorlutik angalasinnaasut, periarfissaq ukiup ilaannaani maanna piummat.
Issittumili imaatigut angallannikkut periarfissat nutaat aamma nalorninartoqartitsissapput, sikummi ingerlaarnera naatsorsoruminaappoq taamaattumillu navianaateqarsinnaalluni.
Imarsiortut isumannaannerusumik angalasalersinnaanissaat siunertaralugu University College of Londonimi teknikki nutaaliaasoq atorlugu misissuisoqarpoq. Ilisimatusartup Rachel Fillingip avataarsualiartaat Cryosat atorlugu Issittup sikua ilisimatusarfigaa.
- Issittup imartaatigut aqqutissat ammariartulerinut uppernarsaatissaqalernerani atuisussat sikup qanoq issutiginera ullormit ullormut ilisimasariaqassavaat. Issittumi ilisimatusarnermut imaatigullu angallattunut iluaqutissanik ineriartortitsinitsinni paasisavut atorlugit paasissutissat pisariaqartitaat erngertumik tunniussinnaavagut, ilisimatusartoq Rachel Filling BBC-mut taama oqarpoq.