Umiarsuartigut takornariat amerlanerit: 4.500-nik amerlisut

Takornarialerisut suleqatigalugit Destination Arctic Circle misigisassanik nutaanik umiarsuarmik takornarianut suliniuteqarpoq.
Umiarsuarnut takornariartaatinut ilaasut nutaanik misigisassarqartinneqalissapput. Assi © : Mads Pihl
aggustip 26-at 2019 10:50

Destination Arctic Circle umiarsuarnik 94-inik ukioq manna tikinneqarpoq. Takornariat nunanit tamalaaneersut nunatsinnut tikittut katillutik tassani 28.498-iupput. Takornariat umiarsuarnut takornariartaatinut ilaasut siornamut naleqqiullugu 4.500-t missaannik amerlipput.

Destination Arctic Circle tassaavoq Maniitsoq Sisimiullu, nunaqarfiillu arfinillit.

Umiarsuarnut takornariartaatinut ilaallutik ukioq manna tikittut siornamut naleqqiullugu amerlinerat Arctic Circle Businessip, takornartitsinermik ataqatigiissaarisartup, nuannaarutigaa:

- Nuannaarutigaarput sumiiffimmi ataasiinnarmi ineriartortoqanngimmat, kisianni tikinneqartartuni tamani ineriartortoqarmat.

Takornarialerisut suleqatigalugit misigisassanik nutaanik umiarsuarmik takornarianut suliniuteqarpugut, Jesper Schrøder, nunap immikkoortuani takornariartitsinermik siuarsaasoq taama oqarpoq.

Aasivissuit aamma Nipisat, Qeqqata Kommunianiittut, nunarsuarmioqatigiinnut eriagisassatut UNESCO-p allattorsimaffianut ilanngunneqarnikuupput. Nunaqarfik Sarfannguaq UNESCO-p allattorsimaffianut aamma ilaavoq, umiarsuarnilli takornariartaatinit ukiuni kingullerni tikinneqarsimanngeriarluni ukioq manna aggustip ulluisa 27-anni tikinneqassaaq, takornariartaat Ocean Atlantic, 198-inik ilaasoqarluni tassani tikissammat.