Umiarsuarmi takornariartaammi ilaasorpassuit nioqqusaajunnaarallartut

Umiarsuit takornariartaatit marluk inuppassuarnik ilaasullit coronavirusip tuniluunnissaa aarlerigineqarmat mattunneqarput.

Taamaattumik ilaasut inuttallu tuusintilikkaat umiarsuarnit mattunneqarallartunit umiarsuarmiiginnaqquneqarput.

Nunani tamalaani tusagassiorfiit arlallit taama allaaserisaqarput.

Umiarsuaq 1800-nik ilaasulik Taiwanimi illoqarfissuarmut Kaohsiungimut tulaqqusaasimanngilaq, kinamiut pingasut umiarsuarmi ilaasut coronaviruseqartut paasineqarmata.

Umiarsuaq Hongkongimut pingasunngornermi tikippoq. Umiarsuarmi ilaasut inuttallu tamarmik umiarsuarmiiginnaqquneqarput coronaviruseqarnerannik misissortereernissaasa tungaannut.

AAMMA ATUARUK Virusi pillugu ernumanerup umiarsuaq takornariartaat 6000-inik ilaasulik unittoortikkaa

- Qaqugu nioqqusaalerumaarnersut oqaatigisinnaanngikkallarparput, Reuters naapertorlugu Hongkongimi peqqinnissaqarfiup oqaaseqartartua, Leung Yiu-hong, taama oqarpoq.

Umiarsuarmik takornariartaammik coronavirusip tuniluunnissaa aarlerigineqarmat aappassaanik ullualuit ingerlaneranni mattussisoqarallarpoq.

Umiarsuaq takornariartaat alla Japanimi illoqarfiit ilaata Yokohomap avataani ataasinngornermi mattunneqarallarpoq, umiarsuarmi tassani ilaasimasut ilaat coronaviruseqartoq Hongkongimi paasineqarmat.

Tamatuma kingornali inuit qulit tunillatsissimasutut siumorneqarput, taakkualu tamarmik qimagussorneqarlutillu napparsimmavimmut nakorsarneqartussanngorlugit unitsitaapput.

Ilaasui inuttaalu sinneri katillugit 3700-uusut tunillatsissimanerminnut tunillatsissimannginnerminnulluunniit paasisaqarnissaminnut utaqqiinnartariaqarput.