Umiarsuarmi ilaasut ulorianartorsiortutut misiginngillat

Justin Salomon ilaasortaammut Sarfaq Ittummut ilaasunut ilaavoq. Umiarsuarmi sulisut pissusussamisut sulisimanerarpai namminerlu isumannaatsumik misigisimalluni oqarpoq, naak umiarsuup ikkarlinnera kalaallisuinnaq aallaqqaammut kalerriutigineqaraluartoq.

- Umiarsuup sajunneratigut iterpunga, nalunanngilaq arlaannik susoqartoq.Unnuap qeqqata missaani pivoq, Maniitsumiit aallarnitta akunnerit marluk missaa qaangiunneranni. Højttalerimiit kalaallisut nalunaaruteqartoqarpoq, kalaallisut paasisaqarsinnaannginnama qanoq oqartoqarnera naluara.

Sarfaq Ittumi sulisut taamatut pisoqarnerani qanoq iliuuseqarpat?

- Isumaqarpunga pissusissamisoortumik højttalerikkut nalunaaruteqartoqartoq eqqissisimasumillu pisoqarneranik ilisimatitsisoqarluni, naak kalaallisuinnaq nassuiaasoqarnera siullermik toqqissisimanarpallaanngikkaluartoq.

Sivitsunngitsoq umiarsuarmi ilaasut katersuunneqarput.

- Piffissaq sivisunngitsoq qaangiuttoq kikkut tamarmik paasivaat susoqarsimanersoq, ilaasut tamarmik ataatsimoortinneqarput. Kantiinami kaffimik tiimik naatitanillu sassaallerfigineqarpugut. Umiarsuarmi sulisut umiarsuarmi ilaasut kisimiittut, soorlu uanga kisimiittunga, katersorpaat, kisimiissanngitsugut nalunaarfigineqarpugut, oqarfigineqarpugut kisimiittutut misigisimassanngitsugut.

Umiarsuaq immap ulinneranit akunnerit pingasut qaangiummata ikkarlummiit kaanngarsinnaasimasoq, Arctic Umiaq Linemiit nalunaarutigineqarpoq.

Umiarsuaq Nuup talittarfianut tikimmat umiarsuarmi ilaasut inuup pissusaanut ilisimasalimmut oqaloqateqarnissamut neqeroorfigineqarput.

Umiarsuaq Nuup umiarsualiviani maannakkut misissorneqarpoq.

Neriuutigineqarpoq Sarfaq Ittuk angalanissamut pilersaarutaasut malillugit tallimanngorpat avannamut ingerlaarluni angalaqqilerumaartoq.