Umiarsuaq takornariartaat meeqqanut tunisilluarpoq
Takornariartaammi takornarianut nassuiaasartoq Sisimiunilu Blue Water Greenlandimi sulisoq uleqatigiillutik tamanna pilersippaat.
-Umiarsuami takornariartaammit attavigineqaratta illoqarfimmi Børnehjemimi najugaqartut arlaannik pisariaqartitsinersut Børnehjemimi sulisoq Niels Berthelsen attavigisimavara. Aningaasanillu atorfissaqartitsisinnaanerat takornariartaammut apuullugu. Tamannalu iluatsilluarpoq, aningaasammi 8.153 koruunit umiarsuarmi takornariartaammi børnehjemimut tunissutissatut katersorneqarsimapput, Frank Mieth Johannessen Blue Waterimeersoq, umiarsuarmiillu børnehjemimut ataveqaataasoq taama oqaluttuarpoq.
Børnehjemimi Gedrud Rask Mindemit Sisimiuni sisorartartut peqatigiiffiat SSP meeqqat sammisassaqartinniarlugit qanimut suleqatigineqarput. Tassalu aningaasat tyskit takornariartaataannit katersorneqartut sammisassaqartitsiniarnermut atorneqassapput.
-Aput kingumut takkuteqqippat børnehjemimi najugaqartut sisorariassapput. Neriuutigeqaaralu illoqarfimmi suliffeqarfiit tunissutip atorluarneqarnera isiginiarumaaraat. Naatsorsuutaanngikkaluartumimmi aningaasanik tunissuteqarneq maanna meeqqanut iluaqutaasussanngorpoq, Frank Mieth Johannessen, takornariartaammi takornarissanut tunisisunut qujamasoqisoq taama oqarpoq.