Umiarsuaq napparsimmavik kalaallip Trumpimut tapersersuisup isumassarsiarigaa

Amerikamiut nunatsinni peqqinnissaqarfimmut tapersiissuteqarniarnerat Trumpimut nuannaartorinnittumit, qarmaasuusimasumit, Jørgen Boassenimit isumassarsiaarpasippoq.

Tamanna Boassenip KNR-imit sapaammi unnukkut apersorneqarnermini nammineq oqaatigaa:

- Inuit peqqinnissaqarfiup aaqqissugaanera pillugu qanoq allaaserinnittarnersut ilisimavara, aamma inuit peqqinnissaqarfik naammagittaalliuutigigaat piffissap ingerlanerani takunikuuarput, taanna Amerikamiut naalagaaffiup ilaanit oqarasuaatikkut oqarpoq.

Tamatuma kingorna tusagassiorfiit arlallit, matumani Danmarks Radio, TV2 aamma Amerikamiut aviisit The Wall Street Journal ilanngullugit taama aamma saqqummiussaqarput.

Boassenip qarnganit Donald Trump inuaanut

52-inik ukiulik, qarmaasoq akiliisinnaajunnaarsimasoq Qaqortumeersoq USA-mi januaarimili angalalerpoq, taassuma USA-p immikkut aallartitaa, Jess Landry taassuma naalagaaffimmi angerlarsimaffiani, guvernøriiffigisaanilu, Louisianami ilaatigut peqatigaa.

Amerikamiut præsidentiata Kalaallit Nunaanni innuttaasut napparsimasut ikiorniarlugit umiarsuarmik napparsimmavimmik aallartitsinissamik nalunaaruteqarnissaanut ullualuit sioqqullugit Boassen aamma kalaaleq quiasaarusiortartoq, Sikkerneq Olsen Landryp guvervøritut angerlarsimaffianni unnuipput.

- Inussiarnersorujussuuvoq, Boassen oqarpoq.

Trumpip umiarsuaq napparsimmavik pillugu inoqatinut attaveqaatimigut Truth Socialikkut arfininngornermi unnukkut taanna nalunaaruteqarnerani Landryp Donald Trump præsidentip illorsuani nereqatigaa.

Landryp aviisimit, The Wall Street Journalimit apersorneqarnermini isumassarsiaq Trumpimut siunnersuutigaa, taassuma taanna saqqummiunniarlugu aalajangerpaa.

Immikkut ittumik aallartitap Boassen quiasaarusiortartorlu Sikkerneq Olsen Louisianamut qaaqqusani peqatigalugit nunami pissutsit pillugit oqaloqatigiissimallutik aviisimut aamma oqaatigaa. Taassumalu peqqinnissaqarfik immikkut maluginiarsimallugu oqaatigaa.

Trumpip Truth Socialimut saqqummiussaani Landry immikkut taaneqarpoq.

- Louisianap guvernøritsialassua Jeff Landry suleqatigalugu napparsimasorpassuarnik isumagineqanngitsunik isumaginnittussamik, umiarsuarmik Kalaallit Nunaannukartitsissaagut. Aggeriartorpoq!!! 

Landryp “kalaalerpassuit” peqqinnissaqarfik pillugu oqaloqatigereerlugit umiarsuarmik napparsimmavimmik aallartitsinissamik aalajangertoqartoq, inoqatinut attaveqaatikkut X-ikkut kingorna allappaa.

Landry Boassenip Olsenillu saniatigut allanik oqaloqateqarsimanersoq erseqqinngilaq.

'Umiarsuarmut tunngasoq saqqummereermat paasiniaaffigaanga,' Boassen oqarpoq. 'Jørgen qanoq ippa,' taassuma ikiortini Boassenip ilagisaa aperisimagaa, taanna oqarpoq.

'Ikiorneqarnissamik pisariaqartitsivugut'

Boassenip oqarnera naapertorlugu isumassarsiamut peqataasimanini qularutissaanngilaq, aamma naak umiarsuaq napparsimmavimmik toqqaannartumi oqaluuserineqanngikkaluartoq.

- Peqqinnissaqarfimmi ikiorneqarnissamik pisariaqartitsisugut oqaatigaara. Danmarkip tamaat isumagisinnaanngilaa, Boassen KNR-imut oqarpoq.

Boassenip oqarnera naapertorlugu nunatsinni inuppassuit peqqinnissaqarfimmit pisariaqartumik ikiorneqanngitsorpassuit tusartarpai. Amerlasuunit inoqatinut attaveqaatitigut allaffigineqartarluni oqaatigaa, taassumalu kalaalerpassuit nunatsinni peqqinnissaqarnermi pissutsit naammagittaalliutigigaat takusarnerarpai.

- Ikiorneqarnissamik pisariaqartitsivugut, taanna oqarpoq. 

- Suut tamarmik sammiveqanngillat.

Naak peqqinnissaqarfik nunatsinni akisussaaffigineqalereeraluartoq, 'politikeritta qanoq pitsaanngitsigisimanerat' piffissami matumani pissutsit takutikkaat taanna isumaqarpoq.

Boassenip nalunngisani pisariaqartumik katsorsarneqarsimanngitsut eqqaanerisa saniatigut anaanani Qaqortumi napparsimmavimmit nappaataanik kukkusumik suussusersiisoqarnerata nipaallisaatinillu tunineqarluni angerlartinneqarnerata kingorna aakkut aseruuttoornini 2003-mi toqqutigisimagaa, KNR-imut oqaatigaa.

- Ikiorneqarnissamik pisariaqartitsivugut. Kalaallit Nunaannut pitsaanerpaaq kissaatigaara, Boassen oqarpoq.

Umiarsuarmut tunngatillugu killiffik

Umiarsuarmik Kalaallit Nunaannukariartortoqanngitsoq USA-mit pisortatigoortumik nalunaarutigineqartoq, The Wall Street Journal allappoq.

Amerikamiut illersornissaqarfiat USA-p umiarsuarnik napparsimmaviusunit marlunnit Kalaallit Nunaannut aallartitseqqussuteqarfigineqanngitsoq, atorfillit aviisimut ataasinngormat oqaatigaat, umiarsuillu marluk Alabamami Mobile-imi aserfallatsaaliorneqarnerarlugit.

Landryp The Wall Street Journalimit apersorneqarnerani marlunngornermi saqqummertumi immikkut aallartitap umiarsuaq napparsimmavik aallartinneqarumaartoq oqaatigaa, aamma umiarsuup aserfallatsaaliorneqarnera aasamut aatsaat naammassissagaluarpalluunniit.

Taassuma Kalaallit Nunaat Danmarkiluunniit suliamut atatillugu isumasioqatiginiarlugit eqqarsaatiginagu ilanngullugu oqaatigaa.

- Sakkutooqarfik suleqatigissavara, Landry The Wall Street Journalimut oqarpoq.

Umiarsuarmik, præsidentip immikkullu aallartitaata takorluugaattulli - taama ajornanngitsigisumik pisinnaarpasinngitsumik, Kalaallit Nunaanni sineriaaniittoqalissanersoq Boassen aperineqarami ima akissuteqarpoq:

- Innuttaasut qanoq kissaateqarnersut takulaariartigu, Boassen oqarpoq.

'Naalakkersuisuunngitsut,' taanna nangilluni oqarpoq, taassumalu naalakkersuisut innuttaasut qanorpiaq kissaateqarnersut paasisinnaanngikkaat innersuussutigalugu.