Umiarsuaq inussianik assartuutaasarsimasoq USA-imi kuussuarmi nassaarineqartoq
Alabamami oqaluttuarisaaneq pillugu ataatsimiititaliaq, Alabama Historical Kommission, Facebookimi taama saqqummiussaqarpoq.
Umiarsuaq inussianik assartuisarsimasoq kingullersaasimavoq ukiullu arlerlugit ujaarineqarsimalluni, ataatsimiitialiaq ilisimatitsivoq. Tamannalu inussiat kinguaavinut tusarluarnartuuvoq.
USA-mimi Kongressip inussianik assartuineq 1807-imi inerteqqutaalersippaa, taamaakkaluartoq umiarsuaq Afrikamit USA-mut inussianik isertortumik ukiorpassuani assartuisarsimavoq.
Umiarsuaq Alabamap kuussuani kiversarneqarsimassasoq, oqaluttuarisaanermik ilisimatusartut nalilerpaat,
inussianimmi assartuisarnermi uppernarsaatit isertuunniarneqarsimammata.
- Mannali umiarsuaq sumiissusersineqarmat amerikami oqaluttuarisaanermi kapitali puigugaq saqqummerpoq,
itsarnisarsiooq, Fredrik Hiebert National Geographicimut oqarpoq.
- Clotildamut ilaasimasut kinguaavisa taama pisoqarnissaa kinguaariinni arlalinni neriuutigisimavaat. Neriuutigisaasalu kiisami piviusunngornera nuannaarluta oqaatigisinnaanngorparput,Alabama Historical Commissionimi pisortaq, Lisa Demetropoulos Jones, atuagassiamut National Geographicimut taama oqarpoq.
Inussiat 390.000-it tungaannoortut 1600-kkunnit 1860-imut Afrikamit USA-mut umiarsuarmik ikaanneqarsimanissaat ilimagineqarpoq.
National Geographic naapertorlugu umiarsuit tuusintillit inussiat niuerutigineqarnerinut atorneqarsimapput, umiiarnikulli ikitsuinnaat nassaarineqarsimallutik.
