Umiarsuaq assortuussutaavoq
Roald Amundsen, sikuiuitsumut ilisimasassarsiortartoq norskeq tusaamasaq, Sullualukkut siullersaalluni umiarsuarmik angalanikuuvoq, kingusinnerusukkullu, 1920-ip missaani, Kangianut Aqqutikkut aamma umiarsuarmik, immat issittut avannarliit misissorlugit, angalavoq.
Umiarsuit angalanerminni atugaasa ilaat, Maud-imik atilik, ukiuni arlalinni angallatigereerlugu Alaskap eqqaani sikumit kiggigussaavoq. Amundsenilu norgemiut issittumi sapiitsuliortorigaluaraat, aningaasaqarnerliulersimavoq, umiarsuarlu Maud, Roald Amundsenip akiligassaqarfigisaanit arsaarinnissutaavoq.
Maud niueqatigiinnit Canadameersunit, Hudson Bay-imit, kingusinnerusukkut pisiarineqarpoq, niuertarfittut angalasinnaasutut atorneqarluni. Eqaluttuutsiami Nunavummiittumi 1930-mi kivinissaata tungaanut.
Norgemiut ilaasa umiarsuaq Amundsenip alliartorfianut maanna utertinnialerpaat, katersugaasivittut atorniarlugu. Umiarsuarlu suli Eqaluttuutsiamiikkaluartoq Norgemi kommunemit Askermit pigineqarpoq, kommunep ukiut 20-t matuma siorna niueqatigiinnit Hudsod Bay-imit 1 dollar-iliinnarlugu pisiaraa. Piginnittuunerli naammanngilaq. Kulturikkut avammut tunisanut akuersissut amigaataavoq.
Eqaluttuutsiami innuttaasut akuersisummik tunniussisoqannginnissaa anguniarpaat. Eqaluttuutsiami ataatsimiititaliamik pilersitsisoqarsimavoq, umiarsuup Canadap oqaluttuarisaanerani eqqaassutissatut nalunaarutigineqarnissaanik suliniartussamik, eqqaassutissatut nalunaarutigineqarpat nunamit anninneqarsinnaajunnaassammat.
Asker kommunep, Eqaluttuutsiamiluunniit innuttaasut, kulturikkut eqqaassutissaq pillugu assortuunneranni sorliit ajugaassanersut ukiup matuma ingerlanerani aalajangiiffigineqassaaq.
