ASSIT Umiarsuaq aatsaat taama siusitsigisukkut Sullualukkoorpoq

Angalanerlu ilimagisamit ingerlalluarnerusoq, umiarsuup naalagaata Jyri Viljanenip oqaatigaa:

- Ilimagisamiit silaginneruvoq. Ullut 24-t angalanitsinni ullut 20-t missaanni seqinnerpoq, umiarsuup MSV Nordicap naalagaa Jyri Viljanen oqarpoq.

Sullualuk silap pissusiata allanngoriartornerata kingunerisaanik ukiuni kingullerni angallaviusinnaanerulersimavoq, immammi sikua aasaanerani ukiaaneranilu aannerusalersimammat.

MSV Nordica Vancouverimit juulip ulluisa tallimaanni aallarpoq, Sullualukkoorlunilu Nuummut ullut 24-t qaangiummata tikilluni. Umiarsuaq Sullualukkut aatsaat taama siusitsigisukkut ingerlaarpoq.

Umiarsuup angalanerata taaguutaa tassaavoq The Arctic 100 Expedition, Finlandip naalagaaffinngorneranit ukiut 100-nngornerannut atasumik, Finlandillu Issittumi Siunnersuisoqatigiinni siulittaasuunerani ukioq siulleq malunnartinniarneqarluni. Canadalu matumani aamma puigorneqassanngilaq:

- Canadamiunik aamma ilaasoqarpugut, Canadallu naalagaaffinngorneranit ukioq manna ukiut 150-inngortorsiutigineqarmata nunat marluk nalliuttorsiutigaavut, Jyri Viljanen oqarpoq.

Taanna pingasoriarluni nunatsinneereerpoq, ilimanarporlu siunissami aamma tikeqqikkumaartoq.