Ulussaarsuaq alla Atlantikumi pileriartortoq
Ulussaarsuup Harveyip nalliussimanerata kinguneri Texasimi Louisianamilu suli ilungersuutigineqarput, Caribiamilu USA-llu kujasinnerusuani naalagaaffiit silarlummik sakkortuumik piffissami qanittumi eqqugaaqqissinnaapput.
Amerikami nuna tamakkerlugu ulussaarsuarnik nakkutilliisoqarfiup sisamanngornerup unnuaani nalunaarutigaa ulussaarsuaq 3-mik sakkortussuseqartoq Atlantikumiittoq, nutaarsiassaqartitsiviit arlallit taama allaaserisaqarput.
Ulussaarsuarnut sakkortussutsit tallimat atorneqarput.
Ulussaarsuaq taaguuserneqarsimavoq Irma. Sumut qaqugulu annguteqqaassanersoq oqaatigissallu suli siusippallaarpoq, Caribialli tungaanut illuariartorpoq.
Frankrigimi nutaarsiassaqartitsivik AFP naapertorlugu, ippassaq unnukkut arfineq-pingasut missaani anoraasuasarnera 185 km/t-inik sakkortussuseqarpoq sulilu imaannarmiilluni.
Nutaarsiassaqartitsivik Reuters allappoq silap qanoq innissaanik naatsorsuinerit assigiinngitsut najoqqutaralugit ulussaarsuup sumut illuariartornissaa takuneqarsinnaanngikkallarpoq. Aamma nunamut anngukkuni qanoq sakkortussuseqassanersoq oqaatigineqarsinnaanngilaq.
Naatsorsuinerit allat naapertorlugit sapaatit-akunnerata naanerani, septembarip qulingiluaani qulinganilu, USA-p kitaata-kangisissortaani naalagaaffinnut sinerissamiittunut anngutissangatinneqarpoq.
Naatsorsuinerillu allat naapertorlugit Floridap kujasinnerusianut anngutissangatinneqarpoq Mexicollu kangerliumarnganut illuariartulerluni.
Ulussaarsuaq Harvey aamma sumiiffimmut tassunga annguteqqaarpoq.
/ritzau/