Innaarsunni ulorianartorsiorfiusoq annikillineqaqqittoq
Innaarsunni ulorianartorsiorfittut nalunaarneqarsimasoq kingulleq immap killinganiit nunamut 10 meteriusoq 5 meterinut maanna apparneqartoq, nunatsinni politiit nalunaarutigaat.
Nunaqarfimmiut sissap qanittuani najugaqartut ilaat illuminnut angerlarsinnaasut nalunaarfigineqareerput. Sissamulli qaninnerusumi najugaqartut suli angerlarsinnaatitaanngikkallarput.
Pilersuisoq innaallagissiorfillu suli matoqqagallassapput, aalisakkerivilli isumannaallisaanermi killiliussap avataaniimmat taanna ammaqqippoq.
Royal Greenlandip aalisakkeriviup ammaqqinnera nuannaarutigaa, aalisakkerivimmiittummi qalerallit qerisut 175 tonsiusut qerititsivimmi nakkutigineqanngikkunik maanngaannartinneqarnissaat ernumatigalugit ullumi siusinnerusukkut oqaatigaa.
Aalisakkerivimmi sulisut 25-usut eqimattani marlunni sulisarput ullormullu tunisassiat 14 tonsit naammassisarlugit.
Peqqussutigineqartut malinneqarnissaat piffimmilu ulorianartorsiorfiusumi angallattoqannginnissaa, politiit erseqqissaatigaat.