Ullutsinni aallartitsisarneq qangarnit ajunnginneruvoq

Meeqqat Qallunaat Nunaannut aallartinneqartarnerat illoqarfiit ilaanni suli atorneqarpoq. Sunamita anguniarlugu? Ilinniartitsisoq anaanaasorlu Lena Ravn Davidsen tamatuminnga aperigatsinni ima akivoq:

-Tassa anguniakkatut pingaarnerpaatut Ilulissani anguniagarineqartarpoq qallunaatut oqaatsitigut piginnaneqarnerulernissaq aamma qallunaat kulturiannik ilisimasaqalernissaq. Inuttullu ineriartornissaq pingaarnerutillugu angalatinneqartarput, nassuiaavoq.

Meeqqat ullumikkut Danmarkiliartinneqartarnerat 1960-70-kkunnut assersuunneqarsinnaanngitsoq inuup inuiaqatigiillu pissusiinik ilinniagartooq isumaqarpoq. Pingaartumik Danmarkimiittarnerup ullutsinni sivikinnerulersimanera eqqarsaatigalugu.

- Meeqqamut qaammatit pingasut ukiumit ataatsimiit nammassallugu ajornannginneralaarsuuvoq, ullumikkullu attaveqaatit ima ajornanngitsigaat allaat mobiltelefonit qarasaasiarlu atorlugit ilaquttanut imaaliallaannaq attaveqarsinnaavugut, taamaammat ullumikkut meeqqat nuannisartaqaat, Marie Rytter naliliivoq.

Meeqqat aallartinneqartinnatik aamma ullutsinni piareersarluarneqartarput, uteraangamillu pisimasunik eqqartueqatigiittarlutik.

Uteraangatamita anaanatut ilinniartitsisutullu qanoq Lena Ravn Davidsenip Ilulissani Atuarfik Mathias Storchimi ilinniartitsisup qanoq maluginiartarpai?

-Uteraangamik meeqqat soorlu sapiissuseqalersimasorujuusaartut malunnartarput. Oqalunniarnermikkut sapiittorujuusarput. Taavalu aamma inuttut arlaannik soorlu qaangigaqarsimallutik sapiittorujuttut misigisimallutik inuttut inerissimasartorujuit malunnartarput, anaanaq oqarpoq.