Ullut 100-t nipangersimasoqareersoq: Doris J. Jensenip Eqaluk Høegh pakatsissutigaa

Kultureqarnermut ataatsimiititaliap Eqaluk Høegh naalakkersuisutut anguniagaanik tusarfigerusullugu ataatsimeeqatiseralugu aggersarpaa, oqarpoq.
Siumumeersup Doris J. Jensenip Eqaluk Høeghip meeqqanut, inuusuttunut ilaqutariinnullu ilisimasanik amigaateqarnerarnera pakatsissutigaa. Asseq toqqorsivimmit. Assi © : KNR
Allattoq Kathrine Kruse
aggustip 19-at 2021 05:48

Siumumeersup Doris J. Jensenip meeqqanut naalakkersuisup atuutilernerminit ullut 100-it qaangiutereersut naalakkersuisutut qanoq iliuuseqarniarnerminik KNR-imit apersorneqarluni tigussaasumik oqaaseqanngimmat pakatsissutigaa.

- Isumaqarpunga una siullertut oqaatigilaartariaqarlugu, ilisimasagut naalakkersuisoqarfitsinniit annikittuaraammata, naatsumik taamak oqaatigalugu. Ilisimasat amigarmata soorunami oqaatigiuminaappoq sunarpiaruna taava qanorpiarlu ingerlariaqqinnissarput sinaakkusersussavarput?

Doris J. Jensenilli oqarnera naapertorlugu taamaattoqanngivippoq.

- Taanna uanga assorujussuaq uissuummissutigivara. Ilisimavarami meeqqanut, inuusuttunut ilaqutariinnullu nunatsinni suliassat annertoorujussuusut, Doris J. Jensen oqarpoq.

AAMMA ATUARUK Eqaluk Høegh ullut 100 sinnerlugit qaangiuttut: Suut suliarissanerlugit suli paaseqqissaanngilagut

- Naalakkersuisoqarfinni ilisimasat annertoorujussuit aamma pigineqareerput. Assersuutigiinnarlugu MIO-p nalunaarusiai imaannnaanngitsut, ulloq unnuarlu paaqqinnittarfiit pillugit nalunaarusiaq aamma politiit ukiumoortumik nalunaarusiaat, inuusuttut pinerlunniartarnerisa qaffakkaluttuinnarneranik imaqartoq, Doris J.Jensen Inatsisartut Kultureqarnermut, Ilinniartitaanermut Ilisimatusarnermut Ilageeqarnermullu Ataatsimiititaliaani ullumikkut siulittaasup tulliatut inissisimasoq, taama oqarpoq.

Taamaammat Eqaluk Høeghip meeqqanut, inuusuttunut ilaqutariinnullu iliuuseriniakkaminik nutaanik sunik pilersaaruteqarluni nalunaaruteqannginnera pakatsissutigaa.

- Naalakkersuisut allannguiniarlutik oqarnikuupput. Kisianni aningaasanut inatsisissaq qiviaraanni tamanna allanngorsimanngitsoq takuneqarsinnaavoq, oqarpoq.

Ataatsimiinnissamut qaaqquneqartoq

Doris J. Jensenip oqaluttuaraa Inatsisartuni ataatsimiititaliat naammagittarlutik Eqaluk Høeghip naalakkersuisutut ivertinneqarnerminit ullut 100-t aatsaat qaangiuppata oqaaseqarniarluni kissaateqarsimanera akuersaarsimagaat. Naatsuaqqamilli oqaaseqarnera pakatsissutigivaa.

AAMMA ATUARUK Anna Wangenheim: Eqaluk Høegh er for stille

- Susoqannginneranimmi kisimi oqaannarpoq, Doris J. Jensen oqarpoq.

Doris J. Jensenillu oqarnera naapertorlugu Inatsisartut Kultureqarnermut, Ilinniartitaanermut Ilisimatusarnermut Ilageeqarnermullu Ataatsimiititaliaata Eqaluk Høeghip anguniagai tusarusullugit ataatsimeeqatiginissaanut aggersaasimavoq.

- Ataatsimiinnissami tassani suut ilisimaneqanngitsut pinerai tusarusuppara. Aamma nalunaarusiat misissuinerillu ilumut naammaginnersut, oqarpoq.

Doris J. Jensenip oqaluttuaraa Kultureqarnermut, Ilinniartitaanermut Ilisimatusarnermut Ilageeqarnermullu Ataatsimiititaliap ilinniartitaanermut, kultureqarnermut, timersornermut ilageeqarnermullu naalakkersuisoq Peter Olsen (IA) aamma Eqaluk Høegh (IA) pilersaarutaat tusarusullugit ataatsimiinnissamut aggersarsimagai.

KNR-imi aaqqissuisoqarfimmit Eqaluk Høegh Doris J.Jensenip isornartorsiuinera pillugu oqaaseqartinniarlugu attavigigaluarparput. Akissuteqarfigineqanngilagulli.

Aamma atuaruk