Ulluni 152-ni tujormineq qaangiuppoq
Eqqartuussissuserisoq pikkorissoq, toqusut timaannik misissuisartut nakorsallu eqqartuussivinnik siunnersuisartut ikiortigalugit Hans Peter Petersen ippassigami parnaarussivimmiit anivoq pasillerneqarunnaarlunilu. Mattusimaneqarneq qaangiuppoq, misigissutsitigut aalassassimaartitaajuarneq qimallugit inuuneq naliginnaasoq maanna uterfigaa.
- Parnaarussivimmiinneq tujorminarsimaqaaq qamuuna nammineq nalunagu pisumut pisuussuteqarani. Taamaattoq neriuuteqarniarlunga aalajangersimavunga sulisunillu nakkarsarniarneqaraangama pitsaasumik akisarlunga. Arnaatiga toqussimasuugukku qularinngilara niaqulaartunngorsimanissara taamalu pisoqanngilaq. Taamaammat assorsuaq oqiliallannarpoq pasilliissutinik qulangersimaneqarunnaarluni. Aamma uannut iluarpoq ullut parnaarussivimmi atorsimasama oqaluttuarinissaat ullut pisuussuteqanngikkaluarlunga parnaarussaasimaffigisakka. Severinep nammineq inuunini kipitippaa. Naluaraq sooq paasinngisaannassavaralu sooq, Hans Peter Petersen KNR.gl-mut oqarpoq.
Parnaarussivimmiit aninerup kingorna Hans Peter Petersenip "inuuneq nutaaq" aallartippaa. Neriuppoq Nunatsinni katsorsarneqarsinnaassalluni, tamannalu pillugu pisortat oqaloqatigereerpai. Sapaatit akunnerini qulingiluani katsorsarteriarluni Danmarkimut uterniarluni. Tassani saarngujumaarluni Hans Peterp naatsorsuutigaa.
- Neriuppunga Kalaallit Nunaanni oqartussani ikiorneqarumaarlunga. Parnaarussivimmiinninni ikiortigisatuara tassaasimavoq eqqartuussissuserisora. Kisianni taanna imaannanngitsumik ikiuuppoq. Sakkortuunik misigisaqarsimavunga maanna qaangerniagassannik. Tamanna pereerpat nutaamik aallartinnissamut piareersimavunga qularutiginngilaralu Danmarkimi inuunera ingerlaqqissasoq. Sinissaqarnerulaalersimavunga sivisuumik sinissaaruttarsimagaluarlunga. Nuannaarutigeqaaralu parnaarusimaneqarnanga inuunera ingerlaqqissinnaanngormat, Hans Peter Petersen oqarpoq.
