Ullumikkut sukkortut ulluat ippassaq malunnartinneqarsimavoq
Nuummilu sukkortut peqatigiiffiata siulittaasuat Susanne Vestergaard qanoq malunnartitsisimanerlutik oqaluttuarpoq:
- Ippassaq ataatsiniik pingasut tungaannut pisuttuarpungut. Pilutamiit illoqarfiup qeqqa kaajallallungu Pilutamullu uterluta.
Susanne Vestergaarilu oqaluttuarpoq qanoq sukkornermik eqqugaasimalluni:
- Timersunngippallaarlunga puallariataaramalu, taavalu ilaqutariitsinni kingornuttagaangami.
Inuit pualavallaat peqqinnanngitsunik nerisaqarpallaat aalavallaanngitsullu sukkornermik nappaammik diabetes type 2-mik eqqugaasinnaapput. Sukkorneq ilaqutariinni kingornuttagaasinnaavoq. Danmarkimi diabetes type 2-mik sukkortut 80 procentiupput. Nunatsinni qassit sukkornersut kisitsisaatigeqanngillat.
Diabetes type 1 peqqinnanngitsunik nerivallaarnermit aalavallaannginnermilluunniit peqquteqanngilaq, timilli nappaammut akiuussutissaata insulinimit sequtserisarnera peqqutaavoq. Diabetes type 1-mik eqqugaanerusarput meeqqat inuusuttullu. Sukkortullu 20 procentii diabetes type 1-mik nappaateqarput.
Susanne Vestergaarip sukkornermik eqqugaangami suut ilisarnaatit atungarisimallungit oqaluttuarpoq:
- Imerusunneq, querusunneq qasoqqanerlu. Malunginikuuvara allatut qasoqqanikuullunga.
Suullu nerisassat mianersuussimanerlungit nangippoq:
- Ulluinnarni suut nerinerlungit mianersuunnarpoq. Nerisassat sukkutallit orsutallillu pinngitsoorneqarsinnaanngillat, kisianni sapinngisamik pinaveersaartarpakka.
Sukkornermik eqqugaangaanni inuunerup sinneranut nappaataasarpoq, kisianni diabetes type 2 peqqinnartumik inuuneqalernikkut pinaveersaartinneqarsinnaavoq.
Qanga utoqqaat sukkornermik nappaammik diabetes type 2-mik kisimik eqqugaasarput, ullutsinnilu peqqinnanngitsumik inuuneqalernerup kinguneranik inuusuttut aamma eqqugaasalernikuupput.
Sukkortut peqatigiiffeqarput Aasianni, Nuummi Qaqortumilu. Nuummi peqatigiiffik 16-nibik ilaasortaqarpoq. Sukkortut nittartagaat takusinnaavat www.amisut.gl