Ullumikkut Meeqqat Ulloraat

Ullulli tamaasa meeqqat ullorisaraat, suliniaqatigiiffiit kattullutik nunatsinni meeqqat inuusuttullu atugaarisaannik ukkassisut, Meeqqat inuusuttuaqqallu pillugit suliniaqatigiiffimmik taagusilik isumaqarpoq.

Angajoqqaat isumassuisullu meeqqat peroriartornerminni atugarissaarnissaannut qanoq iliornissamik eqqarsaateqarnissaat, Meeqqat inuusuttuaqqallu pillugit suliniaqatigiiffiup kajumissaarutigaa. Tamannalu ullut tamaasa pisassasoq, Meeqqat inuusuttuaqqallu pillugit suliniaqatigiiffik isumaqarpoq.

Meeqqallu sammisaqaqateqarnerunissaq, soorlu qaqqasioqatigiinnissaq, atuffassinissaq nerinermilu katerisimaarnissaq, ilinniagassat pillugit oqaloqalitiinneq, meeqqallu ulluinnarni misigisartakkaminnik oqaasinngortitsisinnaanissaannut ikiuineq ilaatigut pineqarpoq. Taamatummi sammisaqaqatigiinneq meeqqamit puijorneqarneq ajortoq, Meeqqat inuusuttuaqqallu pillugit suliniaqatigiiffik allappoq.

Aamma atuaruk Meeqqat eqqaamallugit - aamma Meeqqat Ulluanni

Ullumilu sammisassaritinneqartut arlaqarput, ilaatigut Nuummi Nunatta Katersugaasivia Allagaateqafianilu meeqqanut unammisitsisoqarluni. Illoqarfiillu pingaarnersaat Katuaq suleqatigalugu amerlanernik sammisassaqartitsissaaq.

Ilaatigut Nikolaj Lønstrup Nivissallu tusarnaartitsissapput. Nivissat 2000-imi tusaamasanngortut, ukiut qulit qaangiummata kingullermik tusarnaartitsipput, taakkulu ualikkut nalunaaqutaq marlunit tallimat tungaanut tusarnaartitsissallutik.

Aamma atuarfinni atuaqatigiit siunissamut anguniagassanik siunnersuuteqarnermik unammitinneqarneranni ajugaasut, 100.000 koruuninillu akissarsitinneqartut, Brugsenimit ersersissinneqassaaq.

Tamanna Brugsenip Nuummi sutorniartarfiani ullaakkut nalunaaqutaq qulinut pissaaq.