Ullorissap anarsuata nakkarfia nunarsuarmi annerpaaq Maniitsup eqqaaniippoq
GEUS-imi ilisimatuup ujarassiuullu, Adam Gardep Maniitsup ateqaataa, tassa nunataata maniitsuunera ukiorpassuarni eqqarsaatersuutigiuarsimavaa. 1990-ikkunnilu Maniitsup maniinnera ullorissap anarsuata piliarisimassangaa taamanerniilli ilimagilersimallugu. Isumassarsinanili taannarpiaq saqqummiutissallugu nangaajuarsimavoq:
- Assorsuaq eqqumiippoq, tassami isuma taanna ukiuni qulini qarasarmioriuarsimavara. Ilami tamanna pillugu doktorinngorniutiga illersornikuuara, tassalu arlaatigut paasinngitsuungaqarsimasutut misigiuarsimallunga, Adam Garde oqarpoq.
2009-mili Maniitsup eqqaani nikkel-eqarnera platineqarneralu pillugit Nuna Minerals paasititsiniaanialerluni piareessaaqquneqarmat piffissaq iluatsillugu isummiussimasatoqqani ilumoornersoq paasiniarsinnaanngormagu pinaasinngilaq:
- Taamaammat sumiiffik taanna orneqqilerakku isuma una siuninniitippara: Isummersimanerami ilumuussappat taava? Ullulli pingasuni misissuereerlunga isummiussimasara ilumoortoq paasinarsivoq, tassalu suna tamarmi inissillarlugu. Tamatumali kingorna piffissaq sivisooq atorlugu isummiussara ilisimatuussutsikkut illersorneqarsinnaanngorsarlugu nalunaarsuivunga, Adam Garde oqarpoq.
Suliassarlumi imaannaasimanngimmat Adam Gardep suliani qanittukkut aatsaat naammassisinnaasimavaa.
Maniitsumimi ullorissap anarsuata nakkarfissua milliardtinik pingasunik pisoqaassuseqartup ilisarnaatit naliginnaasut ilisarnaatiginngilai. Taamaariarmallu Adam Gardep periutsit nutaat atorlugit uppernarsaasiortariaqarsimavoq.
- Maannali ima atortorissaartigaagut, qangarsuarli ullorissat anaasa nakkarfissuisa kinguneri nunarsuatta iluinnarsuanut sunniutigisartagai aqqutigalugit sumiissusersisinnaanngornikuuagut, ilisarnaatigisartagalu suunersut paasereeratsigit suut marsissanerlutigit nalujunnaarparput.
Ilisimatoorli nassaarisami pingaaruteqassusaa nammineq oqaasertalersorusunngikkaluarlugu ullorissap anarsuata nakkarfissuata isorartunersuata qanoq annertutiginersua paasinarsisippaa:
- Ullorissap anaata nakkarfikorsua maanna erseqqippiarunnaareeraluartoq taamaattoq 150 kilometerinik diametereqarnissaa missingersorparput. Tassa nakkarfikorsuaq nunarsuatsinni annertunerpaajuvoq, tassalu ullorissat anaasa nakkarfikorsuinut ilisimasatsinnut allanut naleqqiullugu marloriaammik annertutigisorsuulluni.
Ujarassiuulli eqqumiigiuarsimasaata suunera kiisami paasimmagu qanoq misigisimanerluni oqaatiginissaanut nangaassuteqanngilaq:
- Allaanngilaq qaqqarsuarmulluunniit qaqiinnallartugut, tassami paasisaqqaarnerput taama misinnarpoq, GEUS-imi ujarassiooq ilisimatoorlu Adam Garde taama oqaluttuarpoq.
Maniitsup eqqaani ullorissap anarsuata nakkarfia pillugu nalunaarusiaq atuagassiami Earth and Planetary Science Letters-imi Adam Garde juulip aallaqqaataani saqqummiusiumaarpoq.
