Ulloq ataaseq Folketingimut ilaasortanngorallarit
IA sinnerlugu Folketingimut ilaasortap Sara Olsvigip inuusuttut inatsisartoqarnissaata nunatsinni tusaqqusaarutiginissaa suliassamisut tiguaa. Taassuma kajumissaarutigaa kalaallit atuartut Folketingimi sulinermut soqutiginninnerulernissaat. Tassanimi inatsisit aamma nunatsinni atuuttussat aalajangiiffigineqartarput.
- Immikkuullarissumik misigisaqarnissamut manna periarfissatsialaavoq. Neriuppunga Kalaallit Nunaanni meeqqat atuarfiini atuartut inuusuttut inatsisartuini oqaluuserisassatut siunnersuutinik nassiussiumaartut. Siunnersuutit nassiunneqareerpata sorliit piukkunnarnerunersut toqqartorneqarumaarput tassalu piukkunnarnerit 60-it Folketingip ataatsimiittarfiani oqaluuserineqarumaarput. Peqataasussatut toqqagaasut angalanermut najugaqarnermullu akiliunneqarumaarput taassumalu qaavatigut imaannaanngitsumik misigisaqarumaarput, Sara Olsvig Islandimiit oqarasuaatikkut oqaluttuarpoq tassani maanna isumasioqatigiittuni peqataagami.
Folketingip 8. aamma 9. klasset inuusuttut inatsisartuinik ingerlatsisarnera eqqarsaatigilluagaavoq. Tassami oqaatigineqartarpoq siusissukkut politikkikkut pissutsit iserfigagaanni akuuffigilernissaat pilerigineqarnerulersartut.
- Qularutiginngivippara klasseni ukioqqortussutsit taakku marluk inatsisartoqarnikkut pissutsit ilisimasaqarfigilereeraat aammalu isummersulereersimassallutik pissutsit qanoq ittariaqarnerat pillugu. Isummersuuteqaraanni allassinnaarlugu tassa inuusuttut inatsisartuinut nassiuttariaqarpoq. Nassitsinissamut periarfissaq kingulleq tassaavoq novemberip naanera, Sara Olsvig oqarpoq.
Inuusuttut inatsisartui pillugit uani annerusumik atuarsinnaavutit: http://www.ft.dk/Ungdomsparlament.aspx
