Ulapaarfimmi nipaallisimaarneq

Eqqaaniaanermi Oslop Universitetiani pisortatigoortumik pisumi, peqataapput norgemiut kunngikkormiui Norgellu ministeriunera, Jens Stoltenberg. Illoqarfissuarmi Oslomi nipaallisimanerup nalaani timmissat qarlorpalunneri taamaallaat tusarsaapput.

Nipaallisimanermi peqataasorpassuarnut, tusind-ilikkaanut Jens Stoltenberg qujavoq.

Oslop qeqqani aqquserngit pingaarnersaanni, Karl Johanip aqqutaani Norgemi nipaallisimanermi DR-imiit Ann Mee Nielsen peqataavoq:

- Karl Johanip aqquserngani qeqarpunga. Aatsaaqqinnaaq nalunaaqutaq ulloqeqqanut eqqaaniaalluni nipaallisimasoqarnera tiguartinnarpoq qamuuna attortinnarluni. Ulloqeqqanngitsiarnerani maani aqqusinermi inuit ulapaarlutik ingerlaarput, ilaat pisiniarfilerisimallutik ilaallu takornariaallutik takusassarsiortut.

Ulloqeqqaliivissoq oqaluffiit siarngi sianilermata inuppassuit unillutik tusarnaarput, biilerpassuillu unillutik aamma. Ulloqeqqartorlu suna tamarmi nipaaruppoq.

Politiit ullaatungaa nalunaarput, qeqertami toqutaasut siullermik nalunaarutigineqarnerannik ikinnerusut. Pisup uippallernaqisup pinerata nalaani tusarliussat assigiinngiiaat pissutigalugit toqutaasut qanoq amerlassusaat ilisimaneqavissimanngilaq. Qasserpiaat toqutaasimanersut politiit suli tusarliutinngilaat. Tusarliussaq tamanna pisoq eqqarsaatigalugu tuppallernalaartutut oqaatigineqarsinnaavoq, DR-imit Ann Mee Nielsen oqaluttuarpoq.

Danmarkimi qimuttuitsut unittarfissuanni Københavnimiittumi aamma eqqaaniaasoqarluni minutsimik ataatsimi nipaallisimaartoqarpoq.