Ukrainep præsidentiata Danmark nunallu allat qulingiluat sakkunik amerlanerusunik qinnuigai

Præsident Volodymyr Zelenskyj nunanut avannarlernut – taakkununnga Danmark ilaavoq - aamma baltiskiusunut kajumissaarivoq Ruslandimut sorsunnermi Ukraine annertunerusumik ikioqqullugu.

Piviusumik Danmark nunallu allat qulinngiluat illersornissamut suleqatigiiffimmi Joint Expeditionary Force-mut ilaasortaasut sakkunik amerlanernik qinnuigai.

- Tamatta Ruslandip eqqoriarpaatigut Ukrainelu ataannanngippat kikkut tamarmik Europa akerlerilissavaat. Ikiornitsigut imminut ikiorniaritsi, marlunngormat nunani avannarlerni aamma baltiskiusuni siuttunut aamma illersornissamut ministerinut oqalunnermini oqarpoq.

Volodymyr Zelenskyj Londonimi ataatsimiinnermut peqatavoq videolink-ikkut.

- Sakkut qanoq ittut atorfissaqartinnerivut nalunngilarsi. Ikiunngikkutsigut ajornakusoortorujussuussaaq, qujamasoqaangalu. Kisianni oqarusuppunga amerlanernik atorfissaqartitsilluta, Zelenskyj-p qinnutaa taama oqaasertaqarpoq.

Tuluit Nunaata ministeriunera Boris Johnson ataatsimiinnermik qaaqqusisuuvoq, Danmarkimiillu illersornissamut ministeri Morten Bødskov (S) peqataavoq.

Ataatsimiinnerup kingornatigut Morten Bødskov-ip Ukrainemut sakkunik amerlanenik nassitsinissaq matoqqatinngilaa.  

- Tunngaviatigut akerlerinngilarput, peqativut ilivullu suleqatigaavut. Ullumi ataatsimiinnermit Zelenskyj-mut ilimasaarineq erseqqissorujussuuvoq, tassa ersoqataajumanerput aalajaaqimmat, nangissallunilu, uagullu naatsorsuutigisinnaavaatigut, oqarpoq.

Kisianni piviusumik taanngilaa siunissami ikiuinissaq sunik imaqassanersoq.

Morten Bødskov oqaluttuarpoq Volodymyr Zelenskyj-p ataatsimeeqatiginera killitsissutigisimallugu.

- Politikkimi pisut taama attortinnartigisut misigissallugit qaqutigoortuuvoq. Isiginitsinni præsidenti siullermik ikiuinitsinnut annertuumut qujavoq, kisiannili aamma erseqilluinnarltumik oqarluni suli annertunerusumik pisariaqartitsillutik.   

TV2-p tusagassiortua naapertorlugu Zelenskyj-p oqalunnerani minutsini siullerni tallimat-arfineq-marlunni tusagassiortut najuussinnaasimapput.

Taava kingornatigut ataatsimiinneq tusagassiortunik najuuttoqarnani nangippoq.