Ukrainemut ikiorsiissutissat immikkuullarilluinnartut akuerineqarput

USA-mi Repræsentanternes Husimi amerlanerussuteqartut, Ukraine sakkussianik ikiorneqassasoq ikiorsiissutinillu 426 milliardit koruuninik tapersiivigineqassasoq arfininngornermi unnukkut aalajangerput.

Ukrainemut ikiuunnissaq politikkut isumaqatigiittoqareernerani aalajiagiiffigineqarpoq, Republikanerit Partiianni Ukrainep sakkussianik tapersersorneqarnissaa qaammatialunni matoqqatissimavaat, sakkussiat taakku Ukrainep sakkutuuisa pisariaqartilluinnarsimavaat, tamannalu maannakkut nangeqqinneqartussanngorpoq.

Aalajangiineq Senatimut ingerlateqqinneqarpoq, ikiuinissamummi aningaasat Ukrainemut, Israelimut Taiwanimullu atorneqartussat aalajangiiffigissavaat. Ilanngunneqarporlu TikTok Kinami kiffartuussivik, ukiup ataatsip iluani, USA-mi atuinnarneqassanersoq imaluunniit inerteqqutaalissanersoq aalajangiiffigineqassasoq.

Senatimi pineqartut pillugit naatsorsuutigineqarpoq marlunngornermi taasisitsinissat pissasut. Ukrainemut ikiorsiissutissatut siunnersuut amerlanerussuteqartut tapersersorpaat. Qaammatit marluk matuma siorna, assingusumik taasisitsisoqarmat akuersissutiginnittoqareernikuuvoq.

Ikiorsiissutit Senatimi marlunngorpat akuerineqarpata, præsident Joe Bidenip atsiorneratigut inatsisinngortinneqarlutillu akuerineqassapput.

-Tamanna Europami Amerikamilu Avannarlermi tamatsinnut isumannaannerulersitsissaaq, Natop generalsekretæria Jens Stoltenberg Repræsentanternes Husimi taasinerup kingorna, tusagassiorfinnut nalunaarummini taama allappoq.

Ukrainep præsidentiata, Volodymyr Zelenskyjp, Republikanerit partiiat republikanerillu siulittaasuat, Mike Johnson, immikkut ittumik qutsavigai.

Sorsunneq siaruatsaaliorneqassaaq, inuillu tuusintilikkuutaanik inuunerinik annaassineruvoq, Zelenskyj X-imi (Twitteriunikumi) allappoq.

Ruslandimit rakettinik dronenillu silaannakkoortitsilluni Ukrainemut saassussinerujussuit qaammatikkuutaani kingullerni piuarput, tassanilu illersornissamut atortussat amingaatigineqarput. Ukrainemilu qamutilittaatinut imassat ilanngullugit amigaatigineqarput.

Europa kisimiilluni piffissami sivitsortumi, Ukrainemut sakkunik tunniussisariaqartarsimavoq. Europamiilli sakkunik naammattunik, USA-p tunniussinnaasaatut amerlatigisunik tunniussisoqarsinnaanngilaq.

Amerikamiut sakkussiat Ukrainemut nassiussassaat, apuunneqarnissaasa tungaanut sivisoorsuunavianngitsoq naatsorsuutigineqarpoq .

Ukrainep killeqarfiata eqqaani, Polenimi illoqarfimmi Rzeszorip nalaani sakkussiat peqqumaasivimmiinnerarneqarput, taama aviisi Financial Timesimi allaaserinnippoq.

Ukrainep saniatigut, Repræsentanternes Hus Israelimut 26,8 milliardit dollarinik Israelimut ikiorsiissusiivoq, ilaatigut silaannakkut illersornissamut annertusaasoqarsinnaaniassammat.

Taiwanimut ikiorsiissutissat 8 milliardit dollarsinik naleqarput, tamanna USA-p qeqertanut iligisanullu allanut kangianiittunut, nunanut tapersersuineranik Kinamut takussutissaavoq.

Politikkikkut aalajangiinerit malitsigisaannik, Russit aningaasaataat Amerikamiut aningaaserivianniittut arsaarinnissutigineqartussat, Ukrainemut tamarmik tunniunneqassapput.

Atortussanik pissarsiniarpugut pisumut akissuteqarniarluta, præsident Vladimir Putinip oqaaseqartartua Dmitrij Peskov nutaarsiassaqartitsivimmut Tass-imut oqarpoq. USA-p taamatut aalajangiinera, nunap isigineqarneranut kusananngitsumik malunniutaassaaq, taanna isumaqarpoq.