Ukraine issittumi suli sunniuteqarpoq
Ataatsimiinneq SAO-t, Senior Arctic Officials, akornanni ataatsimiinnerusussaagaluarpoq. Issittumi Siunnersuisoqatigiit apriilimi ataatsimiinnerat Canadamit peqataaffigineqarumanikuunngilaq russit Krim-imik tiguaanerat tunngavigalugu.
Ataatsimiinnissamik taamaatitsineq Ruslandip Ukrainillu akersuunneranut attuumassuteqanngitsoq, Issittumi Siunnersuisoqatigiit erseqqissaraa, tyskit radioanit Deutsche Wellemit oqaatigineqarpoq, nassuaatigineqarlunilu ataatsimiinnissaq oqarasuaatikkut ingerlanneqassasoq.
Issittumi siunnersuisoqatigiit siulittaasuata, canadameersup Leona Aglukkap oqaatigaa, Ruslandip Ukrainemut akersuunnera Canadap isornartorsioraa, Ukrainemilu nutaamik aqutseriaaseqalernissaa Canada-mit tapersersorneqartoq oqaatigalugu.
Issittumi siunnersuisoqatigiit taama nalunaaruteqarnerat, USA-p nunanut allanut ministeriaqarfiata nalunaarutaanut assinguvoq. USA-p nunanut allanut ministeriata nalunaarutigaa, Ruslandip pisortatigoortumik ataatsimeeqatigisarneri ikilisinneqassasut ataatsimiinnerillu ataasiakkaarlugit nalilersorneqaannartalissasut oqaatigalugu.
Tamatumunnga assersuutissaavoq, russit amerikamiullu ilisimatuuisa, Alaskami juunip qaammataani pisussaagaluartup taamaatitinneqarnra tamassumunnga aningaasaliissutaasut uterteqqinerisa kingorna tamanna pilluni.
Canadami Alaskamilu ataatsimiinnissaraluit taamaatiinnarneqarnerisa takutippaat, Ukrainemi pissutsit issittumut aamma attuumassuteqartuusut taamaalillunilu aamma Issittumi Siunnersuisoqatigiit sulinerannut sunniuteqarluni.
Irene Quailep naatsorsuutigaa Ruslandip Ukrainellu akornanni pisut Issittumi Siunnersuisoqatigiit sulinerannut suli siunissami sunniuteqartassasoq. USAp Canadap siulersuisuutitaqarneranik 2015-imi taarsissavaa.
