Ukkusissat: Maqaasineqartunik ujaasineq unitsinneqartoq

Politiit Issittumi Sakkutooqarfiullu inunnik marlunnik marlunngormat unnukkut maqaasineqartutut nalunaarutigineqartunik ujaasinertik unitsippaat.

Angutit marluk Uummannap avannaani Ukkusissat/Perliffiullu eqqaani aalisartillugit sermimit iigartartumik nakkaasoqarpoq. Sermimit nakkaasut angutit aalisarfigisaat umiatsiat marluk kinngutinneqarput.

Angutit pingajuat angalaqataasoq ajunaarsimasoq marlunngornermi unnukkut nassaarineqarpoq.

- Maqaasineqartunik ujaasineq sisamanngornermi nalunaaqutaq 14.46 unitsinneqarpoq, pissutigalugu angutit marluk uumasut nassaarineqarnissaat ilimagineqanngimmat, Kalaallit Nunaanni Politiit attaveqaqatigiinnermi suliat, Camilla Palmann oqarpoq.

Ujaarineqartut ulluni marlungajanni ujaarineqaraluarput.

AAMMA ATUARUK Ukkusissat: Ikiuiartortut Ukkusissanut ippassaq tikipput borgmesterilu aqagu tikissalluni

Maqaasineqartunik ujaasineq marlunngornermi unnukkut 21.15 aallartinneqarpoq, Issittumi Sakkutooqarfiup alapernaarsuutaa Lauge Koch Air Greenlandillu qulimiguuliani SAR S-61 ujaasinermi atorneqarput. Taakku saniatigut illoqarfimmi politiit illersornissaqarfillu ujaaseqataapput, ujaasineralli iluatsinngilaq.

Angutip maqaasineqartup aappaa 29-nik ukioqarpoq aappaalu 51-inik ukioqarluni.

Avannaata Kommuniani borgmesteri, Palle Jeremiassen ikiugasuartussat ilagalugit ullumi sumiiffimmukassapput.

- Ilaqutariit alianartumik nalaataqartut ikiorneqassapput, Palle Jeremiassen oqarpoq.