Ukiut qulit pisoqaqqittoq: Nunarput suliassaqarfimmik angerlaassisoq
Naalakkersuisut suliassaqarfimmik Danmarkimiit ukiut qulit angerlaassinikuunatik angerlaassilerput.
Inuussutissarsiornermut niuernermullu naalakkersuisoq, Pele Broberg, tusagassiuutinut taama nalunaaruteqarpoq.
Ingerlatseqatigiiffinnut-, Naatsorsuuserisarnermut- Kukkunersiuisarnermullu suliassaqarfimmiit tunngasut Danmarkimit oqartussaaffigineqartut nunatsinniit oqartussaaffigilernissaa naalakkersuisut siulittaasuata Múte B. Egedep ministeriunermut Mette Frederiksenimut ilisimatitsissutigaa.
Tamannalu pillugu Inuussutissarsiornermut niuernermullu naalakkersuisoq, Pele Broberg, danskit naalagaaffianut akisussaaffik taanna qanorpiaq qaqugulu nunatsinnit tiguneqassanersoq isumaqatiginninniutigisussanngorpaa.
Suliassaqarfimmik tigusaqarneq ukioq 2010-imi kingullermik pivoq. Suliassaqarfiit tiguneqartut taamani tassaapput Aatsitassaqarnermut imartanilu Sulinermi avatangiisinut suliassaqarfik.
Ingerlatseqatigiiffinnut-, Naatsorsuuserisarnermut- Kukkunersiuisarnermullu suliassaqarfiit tunngasut tiguneratigut nunatsinni inatsit malillugu sulinissamut eqaannerulersitsissasoq, Pele Broberg tusagassiuutinut allappoq.
Nunatsinnilu niuernerup iluani pitsaanerusumik nakkutiginninerulersinnaassalluni.
