Ukiut pingasut tulleriisiinnarlugit aningaasarsiorneq annikilleriartoq
Naatsorsuinerit kingulliit takutippaat siorna akit qaffakkiartornerat ilanngaatigereerlugu tunisassiornerup nalinga (BNP) 1,6 procentinik appariarsimasoq.
Ukiut pingasut tulleriisiinnarlugit aningaasarsiorneq annikilleriarpoq maannalu annikilleriarnera annersaalluni.
2012-imi annikilleriarneq -0,5 procentiuvoq 2013-imilu -1,3 procentiulluni.
Naatsorsueqqissaartarfik naapertorlugu 2014-imi aningaasarsiornerup annikilleriarneranut peqqutaanerpaavoq sanaartornerup iluani tunisassiornerup malunnaatilimmik kinguariarsimanera.
AAMMA ATUARUK Suliffissaaleqisut ikiliartuinnartut
Ukiormannali kisitsisit pitsaanerunissaannut neriuutissaqarpoq, minnerunngitsumik illoqarfiit pingaarnersaanni sanaartortoqarnerulernera pissutigalugu. Taamaammat aamma suliffissaqartitsinermut tunngatillugu kisitsisit pitsaanerulersimapput.
Inuit 2.849-t suliffissarsiortutut ukiormanna oktobarip qaammataani nalunaarsorneqarsimapput, siorna ukiup taamaalineranut naleqqiullugu 429-nik ikinnerullutik.