Suliffissaaleqisut ikiliartuinnartut

Kalaallit Nunaanni Naatsorsueqqissaartarfiup kisitsisaataasa takutippaat, ukioq mannalu septembarimi suliffissarsiortutut nalunaarsukkat katillutik 2644-sut, siorna piffissap taamaalineranut naleqqiullugu ikinnerullutik.

Ukioq manna septembarimi suliffissarsiortutut nalunaarsukkat 2644-t akornanni 383-it nunaqarfinneersuupput, siornalu septembarimut naleqqiullugu katillugit 338-nik ikinnerusut, Naatsorsueqqissaartarfiup kisitsisaataasa takutippaat, inuillu illoqarfinni suliffissarsiortutut ukioq manna septembarimi nalunaarsukkat katillutik 357-iusimallutik.

Suliffissarsiortutut nalunaarsukkat pillugit kisitsisit suliffissarsiorlutik kommuninut nalunaarsimasut aallaavigalugit suliarineqartarput. Inuk ataaseq suliffissarsiortutut naatsorsugaasarpoq qaammatip ingerlanerani ataasiarluni arlaleriarluniluunniit nalunaarsorneqarsimanera apeqqutaatinnagu, suliffissarsiortutulli nalunaarsukkat nikerarnerisa piffissap ingerlanerani mianersortumik paasineqassasut, Naatsorsueqqissaartarfiup allaaseraa.

Suliffissarsiortutut nalunaarsorneqarnerat aallaavigalugu aamma paasinarsivoq angutit 50-it 54-illu akornanni ukiullit amerlanerpaasut, angutillu nunaqarfinniittut 20-t 42-llu akornanni ukiullit amerlanerpaasut.

Arnat 45-t 49-llu akornanni ukiullit suliffissarsiortutut nalunaarsorneqarsimasut akornanni amerlanerpaapput.

Najoqqutarisaq: Naatsorsueqqissaartarfik.