Ukiut arfineq-marluk qaangiuttut: Naalakkersuisut mittarfinnut tunngatillugu kiisami isumassarsianut siunnersuusiorniartut

Ittoqqortoormiini Tasiilamilu mittarfiit ukiut marluk utaqqisinneqareerlutik alloriaqqiulaarfiusinnaalerput.

Tassami Aningaasaqarnermut Akileraartarnermullu ataatsimiititaliap illoqarfinni taakkunani marlunni mittarfiit sanaartornissaanut isumassarsianut siunnersuusiornissamut aningaasanik immikkoortitsiniarluni aalajangerpoq.

Illoqarfinni taakkunani marlunni qulimiguulinnut maannakkut taamaallaat mittarfeqarpoq – tunumilu Kulusummi Nerlerit Inaannilu timmisartunut mittarfiit marluullutik.

Isumassarsianut siunnersuusiornermi mittarfiit sumiissanersut aalajangerneqassaaq aamma silap qanoq ittarnera paasiniarlugu silasiornermut misissueqqissaartoqassaaq.

Tamatuma kingorna mittarfiit ilumut sanaartorneqarnissaanersut aatsaat aalajangerneqassaaq. Taakku qanoq akeqassanersut suli ilisimaneqanngilaq.

- Mittarfissat qanoq pitsaanerpaamik ilusilersorneqarsinnaanissaannik kiisalu piffissaq eqqorlugu tikittarnissanut/aallartarnissanut, isumannaallisaanermut, politikkikkullu kissaatinut tulleriiaarneqarsimasunut allanut Tasiilami Ittoqqortoormiinilu mittarfissat naatsorsuutitsinnik naammassinnissinnaassanersut annerusumik ilisimasaqarnerulersissavaatigut, ineqarnermut attaveqaasersuutinullu naalakkersuisoq, Erik Jensen (Siumut) oqarpoq, taassumalu isumassarsianut tunngavissiornissaq mittarfinnut taakkunannga marlunnut atatillugu ”alloriangaatsiarnerunerarpaa”.

2015-imi aalajangerneqartoq

Nunap immikkoortuani mittarfiit nutaat pillugu aalajangiineq nutaajunngilaq. Taanna 2015-imeersuuvoq – tassa ukiut arfineq-marluk matuma siornali. Inatsisartut ukiakkut ataatsimiinnermi nunap immikkoortuani mittarfinni qulinik sanaartornissamut periarfissat misissorneqarnissaat aalajangernikuuvaat.

Ukiut tallimat qaangiunneranni – tassa 2020-mi ukiakkut ataatsimiinnermi – misissueqqissaarneq saqqummiunneqarpoq. Ittoqqortoormiinilu Tasiilamilu mittarfiit kisimik ingerlateqqinnissaat isumassatsialaasoq misissueqqissaarnermi allassimavoq.

Maanna ukiut marluk qaangiuteqqipput. Mittarfiillu pillugit isumassarsianut siunnersuusiornerup naammassinerani mittarfiit ingerlateqqinneqarnissaat aalajangerneqassappat pilersaarusorneq matumani akissatut missingersuutit suliarineqassapput.

Timmisartunut mittarfiit sanaartorneqassappata taakku 799 meterinik takissuseqassapput.

Qeqertarsuarmi, Qasigiannguani, Kangaatsiarmi, Narsami, Nanortalimmi Uummannamilu mittarfiliornissat arfinilinnut ingerlateqqinneqanngitsunut ilaapput.

Tamatuma saniatigut – ilisimaneqartutut – Ilulissani Nuummilu mittarfiliornermik sanaartortoqarpoq. Qaqortumilu sanaartortoqangajalerluni.

Karl Frederik Danielsenimut tatiginnikkunnaarneq

Mittarfiit qulit pillugit suliaq attaveqaasersuutinut naalakkersuisuusimasumut, Karl Frederik Danielsenimut (Siumut) tatiginnikkunnaarnermik kinguneqarpoq.

Tatiginnikkunnaarnermi taasissuteqarnissaq Naleqqap siunnersuutigaa. Taakku illoqarfinni allani mittarfiliornissamik misissuineq inatsisinik unioqqutitsinerusoq erseqqissaatigaat, tamannani nunatta karsianut akisuallaarmat.

AAMMA ATUARUK Karl Frederik Danielsenip tatigineerunnissaagaluaq anigoraa

Attaveqaasersuutinut Naalakkersuisoqarfik naapertorlugu mittarfiit sanaartorneqarsinnaalluarput – kisianni tamanna susassaqarfinnut allanut soorlu ineqarnermut, ilinniartitaanermut peqqinnissamullu susassaqarfinnut kinguneqaratarsinnaavoq, sanaartornissamummi aningaasat taakkunannga pissarsiarineqassapput.

Taamaammat Naleqqap – aamma Inuit Ataqatigiit – Naalakkersuisut tunumi mittarfiit kisimik nunatta aningaasaqarneranut aningaasartuutaanatik inatsimmut naapertuunnerannik erseqqissaalluanngissoraat.

Tatiginninnermillu taasineq pinngitsoortinneqarpoq, Karl Frederik Danielsenilu siorna qinersinissap tungaanut naalakkersuisuuginnarpoq.