Karl Frederik Danielsenip tatigineerunnissaagaluaq anigoraa

Ineqarnermut attaveqarnermullu naalakkersuisumut tatiginikkunnaarnermik taasinissaq pinngitsoortinenqaqqammerpoq. 

Naalakkersuisup Inatsisartut siunnersuummut inatsimmut naapertruutinngitsumut isummeqqusinermigut inatsimmik unioqutitsisimasoq, Partii Naleraq isumaqarami tatiginnikkunaarnissamik siunnersuuteqartuuvoq.

Siumut, Demokraatit aamma Nunatta Qitornai tatiginnikkunnaarnissamut itigartitsipput, taamaammallu Karl Frederik Danielsen naalakkersuisuuinnassaaq.

Naalakkersuisut nunatsinni timmisartuussinermik pitsanngorsaaniarnerat suliami matumani pineqarpoq.

Ilulissani Nuummilu mittarfinnik sanaartornerup Qaqortumilu mittarfiliornissamik pilersaaruteqarnerup saniatigut suli amerlanernik mittarfiliortoqarnissaa Naalakkersuisut kissaatigaat.

AAMMA ATUARUK Partii Naleraq Karl Frederik Danielsenimut tatiginninnginnermik taasisitsiniartoq

Taamaammat Qeqertarsuarni, Qasigiannguani, Kangaatsiami, Narsami, Nanortalimmi, Uummannami, Tasiilami Ittoqqortoormiinilu mittarfiliornissamut periarfissat misissorneqarpoq. Naalakkersuisullu mittarfiit sorliit salliutinneqassanersut pillugu Inatsisartunut isummeqqusipput. 

Sanaartornermut ataatsimiititaliaata siunnersuut suliarereerpaa. Mittarfiillu nunatta karsianut artukkiivallaannginnissaat pillugu inatsisinut innersuussivoq. Tunumilu mittarfiit marluk inatsisit piumasaqaataannik naammassinnittut attaveqaqatigiinnermut naalakkersuisoqarfiullu nassuiaataata ersersippaa.

- Naalakkersuisoq pineqartoq Inatsisartut pisariaqartitaannik paasissutissanik isertuussivoq, Inatsisartut suliaannut pingaarutilerujussuit. Tamakkumi paasissutissat nalunaarusiarineqarsimasumi ersarissumik saqqummeraluarput, Inatsisartunulli aaliangiiffissatut siunnersuummut ilanngunneqarsimanatik, Partii Naleqqap oqaaseqartua Pele Broberg oqarpoq. 

AAMMA ATUARUK Ukiakkut ataatsimiinneq isumaqatigiinngiffiulluni aallartissasoq: Naalakkersuisut marluk navianartorsiortut

Tamannali naammanngilaq. Nalakkersuisoqatigiit partiivi, Siumut Demokraatit aamma Nunatta Qitornai tatiginnikkunnaarluni taatinissamik pinngitsoortitsipput.

Illoqarfinni misissuiffiusuni allani mittarfiliornerit inatsisinik akerliusut Inuit Ataqatigiit Partii Naleqqallu erseqqissaatigaat. Taakkunanili mittarfiliortoqarsinnaassasoq naalakkersuisoqarfik nassuiaammini allappoq. Taamaaliortoqassappalli assersuutigalugu ineqarnermut, ilinniartitaanermut peqqinnermullu aningaasaliissutit ikinnerussapput.

Partii Naleqqalli Inuit Ataqatigiillu inatsisit nunatta aningaasaqarneranut artukkiivallaannginnissaat pillugu piumasaqaatai kisimi Tunumi mittarfiliusinnaasunit eqquutsinneqartut erseqqarinnerutikkusuppaat.