Ukiut 50-it matuma siorna piffissaq unikkallarpoq

USA-imi præsidentiusimasup toqutaareersoq nunarsuarmi nutaasiassaqartitsisut ullut sisamat nutaarsiassaatigisimavaat. Aatsaat taamak nutaasiassaniittoqartigaaq septembari 11-ani 2001-imi pisoq pinissaata tungaanut. John F. Kennedy ukiuni pingasuni kisimi præsidentiusimagaluarluni ullutsinni eqqaamaneqartuarpoq aamma maani nunatsinni puujorneqanngilaq. 

- Ukiut taakkua kingumut qiviarfigissagukkit taava nalunngilarput præsidenti taanna  siullersaalluuni qernertumik amillit qaammasumik amilittut piginnaatitaaffeqalernissai sorsuutigisimavaat. Massakkullu qernertumik amilimmik præsidenteqalernikuuvoq, taamaattumik angut ataaseq asuliinnaq præsidentiusimanngilaq, Inatsisartut siulittaasuat Lars-Emil Johansen oqarpoq.

Taassuma 17-inik ukioqarluni Nuummiilluni tusarpaa præsidentiusimasup toqutaanera.

Josef Motzfeldt isumaqarpoq nunarsuarmi politikki allatut isikkoqarsinnaagaluartoq toqutsineq pisimanngitsuuppat.

- John F. Kennedy inuuginnarsimassagaluarpat nunarsuup aqunneqarnera qanormita ullumikkut isikkoqarsimassagaluarpa? Tamakku allaat naalagaaffisuut akornanni aqutsinikkut ingerlatsiniarnermi eqqarsaatisseeqqataajuaannartutu ersertartoq uanga isumaqarpunga maluginiagassaasoq, Josef Motzfeldt oqarpoq.

Isumaqarporlu taamani pisoq suli sunniuteqartoq.

- Qinugineqartuupput. Taamattumik misigisaq taanna ullumikkumut suli sunniuteqartuumat taanna qularinngeqqissaarpara. Eqqaasitsisarmat nunarsuarmi inuiaat kikkuugaluarunilluunniit inunngornermini naligiitut naleqarnerat tamannalu illersugassaavoq, Josef Motzfeldt oqarpoq.

»Angorusutagut pissaanermik siunertaqanngillat, kisianni pisinnaatitaaffeqalernissamut suliniuteqarnermik... Eqqissineq kiffaanngissutsimik akilersorneqanngitsoq, kisianni eqqissineq kiffaanngissuserlu nunarsuatsinni neriuutigaarput. Guutip tamanna kissaatigippagu aamma uagut angusinnaavarput. John F. Kennedy radiokkut tv-ikkullu oqalugiarnermini 1962-imi ilaatigut taama oqarpoq.

Præsidentip toqutaanerata kingorna Nunarsuarmi inuiaqatigiit attortisimaarput. Lars-Emil Johansennilu taalliorpoq John F. Kennedyp nukaa Robert F. Kennedy toqutaareermat taalliorsimanngisaanaraluarluni.

-Ima sakkortutigisumik taanna sunniuppoq, taalliunngisaannarlunga taamani taalliorpunga. Taalliarivakka taakkua toqutaanerat qanoq naapertorluanngitsigisoq oqaatsiginiarlugu. Taanna eqqarsaatigisarpara... Ima sakkortutigisumik misigissutsikkut attortissimavunga allaat taalliorsinnaanngikkaluarlunga taalliorlunga, Lars-Emil Johansen oqarpoq.

Piffissap unikkallarnera Josef Motzfeldt aamma eqqaamavaa.

-Nipaallisimaneq, suna tamarmi unittutut ippoq. Inuillu café-imi isersimaqataasut ilaatigut qullilisut minittorpaluttullu tusaaneqarsinnaapput. Nunarsuarmi taamani eqqisseqatigiinissamik imaluunniit akaareqatigiinissamik sorsuttup toqutaanera  qularnanngiivissumik tamatta attorneqaatigaarput aliatsaatigineqararlugulu, Josef Motzfeldt oqarpoq.

John F. Kennedy ukiut tallimat toqutaareersoq qatanngutaa Robert Kennedy Amerikami præsidentitut qineqqusaarluni aamma toqutaavoq.