Ukiup massuma naannginnerani Uran pillugu suleqatigiinnissamik isumaqatigiissuteqartoqassaaq
Danmarkip ministeriunera Helle Thorning-Schmidt, Naalakkersuisullu siulittaasuat Aleqa Hammond ataatsimeeqatigeereerlutik ullumi taama nalunaaruteqarput.
- Qallunaat naalakkersuisuinik suleqateqarluarnerput ukioq manna atorluassallugu pingaaruteqarpoq. Isumaqatigiinngissutivummi suleqatigiinnissamut isumaqatigiissutip inissinniartussaassammagu, Aleqa Hammond Ministeriunerup allaffeqarfianni tusagassiortumik katersuutsitsinermi taama oqaaseqarpoq.
Ilami uranimik nunanut allanut assartuinissami kikkut isumaqatigiinniartussaassanersut isumaqatigiinnginnerup qiterisuuaa.
- Nunanut allanut tunngassutilinnut isumaqatigiinniarnissat, ilaatigut uagut aatsitassaatitsinnut tunngassutillit ukkilluinnarpavut. Akisussaaffiimmi – soorlu aatitassanut tunngassutillit Nunatta tigoreersimasai namminneerluta isumaqatigiinniutigisinnaanissaat pingaaruteqarpoq. Taamaammat Danmarkip sorpiaat oqartussaaffigissanerani inississallugu pingaaruteqartuuvoq, Aleqa Hammond oqarpoq.
Kikkut sunut oqartussaassuseqarnersut Naalakkersuisut qulakkeerumasimammassuk Ole Spiermann inatsisilerinermut professoriusoq suliakkersimavaat. Taassumalu misissuereernerata kingorna nalunaarusiaq ippassaq saqqummiummagu uranimik nunanut allanut assartuinermut nakkutilliinissamut nunarput namminneerluni isumaqatigiissuteqarsinnaanera tassani oqaatigaa, tamannali qallunaat ministeriunerannut soqutaavallaarpasinnani.
- Taanna nalunaarusiaq suli sukumiisumik atuarsimanngilarput, taamaasiussaqqaarlutali. Kisiannili oqareernittuut; suleqatigiinnissamut isumaqatigiissusiornissaq pisariaqarpoq, ilami nunanut allanut-, isumannaallisaanermut-, kiisalu illersornissamut politikkimut tunngatillugit Danmark pisussaaffeqarpoq, tamakkulu uagut soorunami nakkutigisarisussaassallutigit. Tamanna Namminersornermut inatsimmeereerpoq, tunngaviusumillu inatsimmeereerluni, Helle Thorning-Schmidt oqarpoq.
Taamaammat ukiut marluk iluini uranimik piiaanermut sinaakkutissat Naalakkersuisut inissinniartussaassagaat Aleqa Hammondip oqaatigaa. Ilaatigullu nunat tamalaat maleruagassaat pisussaaffiillu suunersut qulaajarneqassallutik.
