Ukiuni marlunni misigisassarsiorneq naammassivoq takorluugarlu piviusunngortinneqarluni

Ilaqutariit Kjeldsenikkut 32.000 sømilit – tassa 60.000 kilometerit imaatigut ukiuni marlunni kingullerni angallavigaat.

Maannali sømili kingulleq angalaffigeqqammerpaat. Taakkumi angallamminnik Kigdluanik Nuummut marlunngormat tikipput.

- Angerlarluni nuanneq, Jens Kjeldsen nunamut tullaqqinnermini siulliit ilaattut oqarpoq.

Taanna Poorskip qeqertaata tungaanut 2022-mi juulip 27-ani aallarpoq, nuliatalu Dorthe Kjeldsenip qaammatit pingasut qaangiummata ikiffigiartorpaa.

- Poorskip qeqertaani ujarassuit tusaamasat takunissaat takorluugaraara, taamaammat angujartorneranni upperinnigilara, ullorsuaq naallugu oqarpianngilanga, Dorthe Kjeldsen oqarpoq.

Allagarpassuit

Dorthe Kjeldsen qaammatinit 24-nit qaammatini arfinilinni ilaavoq. Taamaammat Jens Kjeldsen kisimingaatsiarsimavoq, ajorinngilaali.

- Kisimiittarneq nuannerpoq, kisianni inuk susassaqartariaqarpoq, qiperuisarsimallunga qisummik. Taava allattuisarlunga allakkanik allagavinnit nalunngisannut sumi tamaniittunut.

Akunnerpassuarnilu kisimiittarnini pissutigalugu nunamut tikinnerit tamaasa allakkanik 25-nik nassiussisarluni oqaatigaa. Susassaaleqinngisaannarlunilu oqaatigaa.

Angalanerallu arlaleriarluni pikkunarsimasoq Dorthe Kjeldsenip oqaatigaa, mianersornikkulli naammassisivaat.

- Pisoqartuaannarpoq avaanngusunneq ajorpunga aamma imaq imaannaagami tassa allanngorartarpoq kisianni mianersoraanni uloariananngilaq, Jens Kjeldsen oqarpoq.

Ukiualuit ingerlaneranni aappassaa

Poorskip qeqertaanut angalanerat taamaalilluni nunarsuarmik kaajallaallutik kingullermik angalanerannit allaaneruvoq, angalanerammi maanna unammillernartoqarneruvoq, taamaammallu tamarmik tikeqqinnertik nuannarutigaat.

- Tassa angallammiiginnaavikkatta unnummut siniffimmi sininnissaq immaqa eqqumiilaassooq, Dorthe Kjeldsen oqarpoq.