Birna pillugu suliaq: Ukiuni 18-ini parnaarussaanissaa piumasarineqartoq

- Arnaq inuusuttoq peqqarniisaarfigalugu toquppaa, unnerluussisussaatitaaneq Kolbrún Benediktsdóttir ullumi eqqartuussinermi oqarpoq.

Islandimiumik arnamik toqutsisimasutut unnerluutigineqartup ukiuni 18-ini paarnaarussaanissaa unnerluussisussaatitaasup piumasaraa. Tamanna pillaatini sakkortunersaannit, tassalu ukiuni 16-ini paarnaarussinermit, sakkortuneruvoq.

Visir.is taama allaaserisaqarpoq.

Angutip toqutsisimasutut unnerluutigineqarnermi saniatigut kilisaammi Nanumi sulinermini hashimik 23 kilomik anngiortumik eqqussisimasutut unnerluutigineqarnera unnerluussisussaatitaanerup ullumi tunngavilersuutigaa.

Tassalu unnerluutigineqartoq hashimik anngiortumik eqqussisutut ukiuni marlunni paarnaarunneqassasoq unnerluussisussaatitaasoq isumaqarpoq.

Tamatuma saniatigut unnerluutigineqartup nassuiaataa ataqatigiinngitsoq unnerluussisussaatitaasoq isumaqarpoq.

Taassuma innersuussutigaa, unnerluutigineqartup unnuk toqutsiffiusoq pillugu nassuiaatiminik aggustip ulluisa 21-anni eqqartuussinermi siullermi allanngortitsinera, inuttamullu allamut tikkuaalluni.

- Ilumoortumik oqalunngilaq, unnerluussisussaatitaasoq oqarpoq.

Birna Brjánsdottirip aava biilimit aappalaartumit Kia Riomit piiarniarneqarsimasoq uppernarsaatinit pequttaneersunit takutinneqartoq, unnerluutigineqartullu DNA-mik ilisarnaataanik toqutaasup singiini nassaartoqarsimasoq, unnerluussisussaatitaasup erseqqissaatigaa.

- Nassuiaatip uppernanngitsup allanngortinneqartullu saniatigut suut tamangajammik taassumunnga tikkuussipput, unnerluussisussaatitaaneq, Kolbrún Benediktsdóttir oqarpoq.

Taassuma erseqqissaatigaa, inuttap aappaata siornatigut pasisaagaluartup pinerluttuliornermut ilaasimanissaanut uppernarsaateqanngitsoq.

Aamma unnerluutigineqartup suliamut aningaasartuutit islandimiut koruuniinik 4 millionit koruunit, imaluunniit danskit koruuniinik 240.000 koruunit akilissagai, unnerluussisussaatitaasup piumasaraa.