Ukiuni 35-ni aatsaat taama qinersiartortukitsigisoq: Innuttaasut affaanngitsulluunniit qinersipput
Naqqiut: Folketingimut qinersisarnermi 2007-ip kingornanit aatsaat taama ikitsigisut siusinnerusukkut allapparput. Tamannali eqqunngilaq, tassa Folketingimut qinersisarnermi 1987-ip kingornanit aatsaat taama ikitsigipput.
Folketingimut qinersineq marlunngornermi naammassimmat Nuummi aqquserngit inoqarluarlutillu partiini ataatsimoortoqarluarpoq.
Nunatsinnili kikkut tamarmik qinersinermi ataatsimoornermi peqataanngillat. Qinersisinnaasummi 47,8 procentiinnaat qinersiartorput.
Taamaalilluni qinersiartortut folketingimut 2019-imi qinersinermut, 49,8 procentit qinersiffigisaannut sanilliullugu 2 procentimik ikileriarput.
Taaguussinerit agguataarneri:
Siumut, 37,6 procentinik taaguunneqarpoq.
Inuit Ataqatigiit (IA) 24,6 procentinik taaguunneqarpoq.
Demokraatit 18,5 procentinik taaguunneqarpoq.
Naleraq 12,2 procentinik taaguunneqarpoq.
Atassut 3,6 procentinik taaguunneqarpoq.
Attaviitsoq Tillie Martinussen 0,9 procentinik taaguunneqarpoq.
Folketingimut qinersisarnermi 1987-ip kingornanit aatsaat taama ikitsigipput.
Tamannalu tupaallannartuunngitsoq, Ilisimatusarfimmi politikki pillugu lektori, Maria Ackrén naliliivoq.
- Nalinginnaasumik pissutsit imaapput folketingimut qinersisoqassagaangat qinerseqataarusuttut ikittuararsuusarlutik. Tamanna aamma nunani namminersortuutitatut inissisimasuni Savalimmiuni Ålandimilu takuneqarsinnaassarpoq, lektori oqarpoq.
- Inatsisartunut qinersisarneq qinersisartut soqutigineruaat.
Kikkut sumik aalajangiisarpat?
Inuiaqatiiinni eqimattat aalajangersmasut qinersiartorumasarnerat annikitsuinnaasarnerat qinersisartut taamak ikitsiginerannut pissutaasimasinnaasut ilagaat, Maria Ackrén oqarpoq:
- Innuttaasut inuiaqatigiit ingerlatitaanerannut peqataarpiarneq ajortut soqutiginnilersinniarnissaat peqataatinneqarnissaallu ajornakusoortorujussuusinnaavoq. Taakku ilaat angerlarsimaffeqanngitsuusinnaapput ilaallu avinngarusimasuni najugaqartuusinnaallutik qitiusoqarfinni pisunut ungasissorujussuartut misigisimasuusinnaallutik.
AAMMA ATUARUK Ilisimatusartoq: Folketingimut qinersinissaq pingaaruteqarpoq
Politikerit folketingimut qinersisarnermik soqutiginnittoqarnerulernissaanut annerusumik suliniuteqartariaqanngillat?
- Politikerit Folketingimi qanoq aalajangiisoqartarnera aamma apeqqutit suut Danmarkip nunattalu akornanni sunniuteqarsinnaanera pillugu erseqqissaalluarsimannginnerat pissutaasinnaavoq. Tamanna qineqqusaarnermi immaqa erseqqissarneqarluarnerusinnaagaluarpoq, Maria Ackrén oqarpoq.
Nuummi timersortarfimmi qinersiartortut siuleriiaattut. Assi: Johansinnguaq Olsen/ KNR
Inatsisartunut qinersisoqartarnerani qinersiartortut amerlanerungaatsiarput, innuttaasullu siorna qinersiartortut 65,9 procentiupput.
Nunanit avannarlerleersut aalajangiisuusinnaasut
Inuit Ataqatigiinnit Aaja Chemnitz aamma Siumumit Aki-Matilda Høegh-Dam marlunngormat qinigaaqqipput, taakku ukiuni sisamani Folketingimeeqqittussanngorput-
Taakkulu Danmarkimi naalakkersuisoqatigiinnut nutaanut aalajangiisuulersinnaapput. Taakkumi saamerliit naalakkersuisuunissaannut tapersersuisuupput.
AAMMA ATUARUK Folketingimi ilaasortani nunatsinneersut oqaasissaqarfigisaat makkuupput
Qinersisoqarnerata kingorna saamerliit 87-inik qinigaatitaqarput. Nunanit avannarlernit qinikkanit sisamanit pingasut Mette Frederiksen ministeriunerulertussatut taperserpaat, taakkulu taamaalillutik amerlanerussuteqalersinnaallutik.
Talerperliit 72-inik qinigaatitaqarput, Savalimmiuniillu qinikkamit ataatsimit taperserneqarlutik.
