Ukiortaami oqalugiaat KNAPK-mit iluarineqarpoq
- Pingaartumik issittumi silap pissusaata allanngoriartortillugu pinngortitamut sunniutai pillugit aammalu siunissaq ungasinnerusoq eqqarsaatigalugu inuiaqatigiit akornanni oqallisigineqartariaqarpoq, Leif Fontaine oqarpoq nangillunilu:
Inatsisartunut qinersinermut atatillugu ilaatigut oqariartuutigaarput imaatigut inuussutissarsiornerup ukiuni qulini tulliuttuni pilersaarusiortoqartariaqartoq.
Nunaqarfinni illoqarfinnilu isorliunerusuni piniartut atugarisaat imaannaanngillat ingammik anorersuakulassitillugu sikuniaasaartalersillugulu, taamaattumik ullutsinni piniartut atugarisaat oqallisigineqartariaqarput, KNAPK-ip siulittaasua oqarpoq.
Taamaattoq suliffeqarfissuup Royal Greenlandip namminersortunngortinneqarnissaanik pilersaaruteqartoqarnersoq, ukiortaami oqaluugiaammi eqqaaneqanngimmat KNAPK-imit pakatsissutigineqarpoq.