- Taamaatitsineq aliasuutigeqaarput, taamaatitsinissallu piviusunngornissaa ernumassutigereersimavarput. Nualluutilli inuppassuit katersuunneranni siaruaannissaa aarlerinaateqarpoq, Roskilde Festivalip allaffissornermut pisortaa, Signe Lopdrup tusagassiuutinut taama allappoq.Assi: Ida Guldbæk Arentsen/Ritzau Scanpix

Ukioq manna Roskilde Festivalertitsinissaq taamaatinneqartoq

Ukioq manna Roskilde Festivalernissaagaluamut bilitsisiat aappaagumut nuutinneqarsinnaapput utertinneqarsinnaallutilluunniit.

Danmarkimi ukiormanna Roskilde Festivalertitsinissaq taamaatinneqarpoq. Naalakkersuisummi 
ippassaq nalunaarutigaat, tusarnaartitsinissarsuit inunnillu amerlasuunik katersuutsitsinerit aggustip naaneranut inerteqqutaassasut.
Nipilersornermik festivalertitsinissaq juunip ulluisa 27-annit juulip ulluisa sisamaata tungaanut pissussaagaluarpoq.

Nunatsinneersullu amerlasuut Roskilde Festivalertoqarnissaanut bilitsisereersimagaluarput.

Bilitsi nuutinneqarsinnaasoq utertinneqarsinnaasorluunniit

Bilitsilli appaagu Roskilde Festivalertoqarnissaanut nuutinneqarsinnaasut, festivalimik aaqqissuussisut nittartakkaminni nalunaarutigaat.

- Aappaagumut Roskilde Festivalertoqarnissaanut akuersaareerlutik maannangaaq allanngueqataasinnaavutit.

Taamaalillutit festivalertarnerup qulakkeernissaanut piffissami aggersumi ikiuuteqataassaatit, aaqqissuussisut taama nalunaaruteqarput.

Bilitsimilli pisereersimasut aamma utertitsisinnaassapput.

Nualluutip siaruaannissaa aarlerinaateqartoq

Roskilde Festivali ukiormanna ukiut 50-inngortorsiortussaagaluarpoq, tamannali 2021-mut utaqqinneqartariaqassaaq.

- Taamaatitsineq aliasuutigeqaarput, taamaatitsinissallu piviusunngornissaa ernumassutigereersimavarput. Nualluutilli inuppassuit katersuunneranni siaruaannissaa aarlerinaateqarpoq, Roskilde Festivalip allaffissornermut pisortaa, Signe Lopdrup tusagassiuutinut taama allappoq.

Festivalit allat soorlu Smukfest, Heartland, Tinderbox aamma Northside inerteqqummit eqqugaapput. Taakkuninnga aaqqissuussisut taamaatitsinissamik kinguartitsinissamilluunniit suli nalunaaruteqanngillat.

Isummersuutit