Ukioq manna kulturimut aningaasaliissutinit agguaassineq kingulleq
![](/sites/default/files/styles/image_934x467/public/article_images/foto_2.jpg?itok=DajbQTa5)
Aningaasat agguaanneqartut aningaasaliiffinnit sisamanit agguaanneqarput:
Kulturikkut suliniutinut nalinginnaasunut, filmiliornermik ingerlataqartunut, atuakkanut kalaallisoortunut kulturimillu sulialinnut aningaasaliissutit.
Kingullertullu taneqartunit kulturimik suliallit arfineq-marluk qaammatini marlunni sulinissamut 22.000 koruuninik aningaasaliiffigineqarput, ilaatigut isiginnaartitsisartumut Makka Kleistimut, eqqumiitsuliortumut Lisbeth Karline Poulsenimut atuakkiortumullu Sørine Steenholdtimut.
Aningaasaliissutigineqartunit 2,2 millionit koruuniusunit amerlanersaat (995.000) filmiliornermik suliniutinut agguaanneqarput. Ilaatigut Qullissat oqaluttuassartaat pillugu piviusulersaarut filmiliortup Isak Kleistip peqatigiiffik Ilulissani Qullissat Ikinngutaat suleqatigalugu suliassaanut. Piviusulersaarut alla Hanne Sørensenip suliassaa taaguuteqartoq Uummatit tillerneri aamma aningaasaliiffigineqarpoq.
Atuakkiornermut aningaasaliissutinit ilaatigut Milik Publishing aamma Maanuup Atuakkiorfia aningaasaliiffigineqarput. Milik Publishing kulturikkut suliniutinut nalinginnaasunut aningaasaliissutinit atuakkanik qarasaasiarmiunik aqqaneq-marlunnik suliaqarnissamut aamma tapiiffigineqarpoq.
Tapiiffigineqartut allattorsimaffiat tamakkerlugu nittartakkami naalakkersuisut.gl-imi atuarneqarsinnaavoq.