Ukioq ataaseq sinnereeraalu: Kangerlummi imermik minguitsoqaqqilersoq
Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfik Qeqertarsuup eqqaani Kangerlummi imermik imigassamik misissueqqissaarnerup inernerinik 2021-mi juunip ulluisa aqqarnanni tigusaqarpoq, tassanilu imeq imigassaq saffiugassanik aluminiumimik, saviminermik manganimillu akuerussimasoq takutinneqarpoq.
Namminersorlutik Oqartussat tusagassiuutinut nalunaarummi allapput.
Kangerlummi imeq saffiugassanik aluminiumimik, saviminermik manganimillu mingutsinneqarsimasoq imerneqarnissaalu innersuussutigineqanngitsoq, ukioq ataaseq sinnerlugu matuma siorna tassa 2020-mi maajip ulluisa 28-anni naalakkersuisoqarfiup nalunaarutigaa.
Naalakkersuisoqarfiup nakorsaaneq isumasioqatigereerlugu imeq imerneqaqqissinnaalersutut nalilerpaat.
AAMMA ATUARUK Kangerlummi imeq saffiugassanik akoqartoq
Erngup imernissaa pinasuartumik uloriananngitsoq, imerneqarsimagunilu taamaammat ernumassutigisariaqanngitsoq, nakorsaanerup taamani nalilernikuuaa
Nukissiorfiit imeqarneq pillugu pissutsit pitsanngorsarnissaat taamani sulissutigilerpaat, tamannalu maanna iluatsippoq.
Ukiumi ataatsimi kiffartuussilluartut
Naak utaqqineq sivisugaluartoq Kangerlummi innuttaasut aqqanillit ilaat, Jensigne K. Olsen Nukissiorfiit kiffartuussinerannik ilorrisimaarpoq.
Ukioq ataasersuaq imeqarnikuunasi imeqaleqqilluni qanoq ippa?
- Assorujuk ilorraallannarpoq.
Ukioq ataaseq imeqannginnissinni iliorpisi?
- Ukiup ataatsip iluani imeqarpoq. Imeqqusaanngilaq, kisianni uffarnermut errorsinermullu atorluarneqartorujussuunikuuvoq. Taava Uunartumut akitsinniittumut Nukissiorfimmiit imertaanneqartarpugut
- Imertaassisoqaraangat aallerfissamut ilisarpaat dunkit immereernikut taava taakkunnga aallertarpugut imissamik, Jensigne K. Olsen oqarpoq.
Taava imeqannginneq sungiutiinnapajaarparsi?
- Naamik sungiutinngilarput. Ukiorparujussuit illutsinni imeqarnikuugatta, sungiukkuminaannikuuvoq.Soorunami naammagittarluta utaqqisariaqarpugut tassami imigassaqarniassagatta imermik aallertuartariaqartarpugut, Jensigne K. Olsen oqarpoq.
Ukioq ataaseq imigassamik imeqarnikuunnginnersi pillugu aaqqiiniartoqarnera pillugu arlaannik oqaasissaqarpit?
- Taamaalimmalli aaqqiiniartoqartuaraluarpoq misilerarneqarlutik. Nukissiorfimmiit sulisut misileraasaqattaarlutik, sullissilluartorujussuupput.
- Kingullermik misileraagaluarlutik ajormat Danmarkimut atortorissaarut imermut saliutissaq sanatissimavaat. Kisianni imermik imigassatsinnik Nukissiorfimmiit pissaqartinneqartuaannarpugut, Jensigne K. Olsen oqarpoq.
