Corona ilungersunartorsiortitsigaluartoq ukiakkut ataatsimiittoqassasoq
- Pilersaarutit malillugit ukiaanerani ataatsimiinneq ingerlanneqartussaavoq.
Inatsisartut siulittaasuat, Vivian Motzfeldt (Siumut) KNR-imut oqarpoq.
Peqatigiiffiit, inuussutissarsiornermik ingerlataqartut aaqqissuussisullu aaqqissuussassaminnik coronap ilungersunartorsiortitsinerani taamaatitsiinnartariaqarsimapput. Politikkikkut aaqqissuussinerit – matumani ilaatigut Siumut nuna tamakkerlugu ataatsimeersuarnissaa, Ilulissani sapaatip-akunnerani matumani ingerlanneqartussaagaluartoq ilanngullugu – piffissaligaanngitsumi taamaatiinnarneqarput.
Siumut ataatsimeersuarnissaa ”innuttaasut peqqinnissaat partiillu ataqqinassusaata illersornissaa” pillugit taamaatinneqartoq, Siumut KNR-imut paasissutissiissutigaa.
Katerinnissamut malittarisassat
Inuit amerlanerpaamik 100-it 2021-mi januarip ulluisa 31-ata tungaanut illup iluani katersuussinnaapput. Silami inuit amerlanerpaamik 250-it katersuussinnaapput.
Kommunimit kommunimut angalaqqusaanngilaq. Namminersorlutik Oqartussat katerinnissat pillugit killilersuinerugallartunut nalunaarutaanni paragraf 2-mi allassimavoq:
"Aaqqissuussanut nalliuttorsiornernullu peqataanissamut nalunaarfigineqartariaqartunut atatillugu inuit kommuninit allaneersut aaqqissuussamut peqataanissamut nalunaarsinnaannginnissaat aaqqissuussisup qulakkiissavaa."
Der står også: "Bekendtgørelsen paragraf 2-4 gælder ikke for forsamlinger med med et politisk eller andet meningsbefordrende øjemed".
Aammattaaq nalunaarummi paragraf 2-4-mi allassimasoq naapertorlugu "Naalakkersuinikkut siunertalinnik´suliaqaruvit malittarisasanut sukannersunut ilaanngilatit".
Taamaasillutillu katersuussinnaanermut killilersugaanak, kommunillu killeqarfii akimorlugit angalasinnaatitaallutit.
Katerinnerit tassa Inatsisartunit, Naalakkersuisunit, kommunalbestyrelsinit allanilluunniit politikkikkut partiinit aaqqissuussinerit pineqarput
Peqatigiiffiilli, assersuutigalugu SIK Sulisitsisullu, timersoqatigiiffiilluunniit angalaqqusaanngillat.
Tusarfik: Naalakkersuisut.
AAMMA ATUARUK Siumut: Nunatsinni coronamut illersuiniarluta taamaatitsivugut
Corona pillugu malittarisassat isornartorsiorneqaqattaarput. Assersuutigalugu kommunit killeqarfii qaangerlugit aaqqissuussinernut peqataajartorluni angalaqqusaanngilaq. Politikeriugaannili malittarisassat allaanerupput. Taamaammat Inatsisartuni politikerit nunatsinni angalallutik ukiakkut ataatsimiinnermut peqataajartorsinnaapput.
Taamaatiinnarnissaanut pingaaruteqarpallaartoq
Ukiakkut ataatsimiinneq septembarip ulluisa 25-anni aallartissaaq.
Taamaatinneqaannarnissaanullu pingaaruteqarpallaartoq, Vivian Motzfeldt isumaqarpoq.
- Inatsisartut ataatsimiinnissaat apeqqusersugassaanngilaq. Inuiaqatigiinni apeqqutit takkuttuartut suliassallu ingerlajuartut unittoortinneqannginnissaat pingaarnerpaatut uani isumaqarfigaara, taanna oqarpoq.
AAMMA ATUARUK Kina susinnaatitaava? Corona pillugu malittarisassanut ilitsersuut aana
Siulittaasoqarfiulli coronamut pissutsit sillimmaffigigai, Inatsisartut siulittaasuat oqarpoq.
- Massakkuugallartumik peqqussutit aallaavigalugit eqqumaffiginninnerit piareersaatinillu eqqummaarinninneq ingerlavoq, Inatsisartut siulittaasuat oqarpoq.
Vivian Motzfeldtip ukiakkut ataatsimiinnermut malittarisassat coronamut tunngatillugu pissutsit allanngoraluarpata naleqqussarneqarsinnaasut paasissutissiissutigaa.
Ataatsimiinneq sivikinnerullunilu allaanerussasoq
Nunatsinni politikerit coronap ilungersunartorsiortitsinera pissutigalugu upernaakkut ataatsimiinnissaat kinguaattoorlunilu sivikinnerusumik allaanerusumillu maajimilu ingerlanneqarpoq.
Inatsisartuni ilaasortat 31-t sumi najugaqarpat
Avannaata Kommunia:
Qaanaaq: 2
Ilulissat: 2
Uummannaq: 1
Upernavik: 1
Kommune Qeqertalik:
Aasiaat: 1
Qasigiannguit: 1
Qeqertarsuaq: 1
Qeqqata Kommunia:
Sisimiut: 4
Maniitsoq: 2
Kommuneqarfik Sermersooq:
Nuuk: 12
Tasiilaq: 2
Kommune Kujalleq:
Qaqortoq: 1
Nanortalik: 1
Coronap ilungersunartorsiortitsinera pissutigalugu Nuummi inuit qulinit amerlanerusut taamanera katersuuteqqusaanngillat. Taamaakkaluartorli ataatsimiittoqarpoq.
Naalakkersuisut siulittaasuata, Kim Kielsenip upernaakkut ataatsimiittoqarnissaata taamaatiinnarneqarnissaa siunnersuutigigaluarpaa. Naalakkersuisummi coronap ilungersunartorsiortitsinerani ulapinnertik pissutigalugu ataatsimiinnissamut nukissaqanngimmata.
Tamannali Inatsisartunit itigartitsissutigineqarpoq upernaakkullu ataatsimiittoqarluni.
