Ukiaanerani ataatsimiinneq: Inatsisartut ineqartinneqarnerat 1,1 million koruuninik akeqarpoq

1 million 116 tusind koruunit. Tassaapput Inatsisartut ukiaq manna ataatsimiinnerminni ineqartinnerannut ikinnerpaamik aningaasartuutaasussat.

Inatsisartut ukiaq manna septembarip ulluisa 24-anni ataatsimiilerput. Pilersaarutillu malillugit novembarip 23-at ulloq tassaassaaq inatsisiliortut ukiaq manna ataatsimiinnerat kingulleq.

Inatsisiliorneq sivisuinnanngilaq. Inatsisiliortummi Nuummi ulluni ataatsimiiffiusuni ineqarnerat katillugu 1 millionit 116 tusindinillu naleqassaaq.

Inatsisartut siulittaasoqarfiat, KNR-mut taama akissuteqarluni allappoq.

Ilaasortat 18-init ineqartinneqartut

Aningaasat taakkua Inatsisiliortuni 31-usuni 18-inut, Nuup avataani ulluinnarni najugaqartunut, Nuummi ineqartinnerannut atorneqassapput. Ullut ataatsimiiffiusut kinguaattoornermik peqqutilimmik sivitsussappata aningaasartuutaasut amerlisinnaapput.

Aningaasartuutit taakkua aningaasanut inatsimmi Inatsisartunut ilaasortat ineqartinneqarnerannut aningaasaliissutinit matussuserneqartarput.

Inatsisartunut ilaasortat ingerlatseqatigiiffiup namminersortup, inissianik attartortitsisartup, LP Investip, inissiaataani Nuummi sumiiffinni assigiinngitsuni najugaqartinneqartut, Inatsisartut siulittaasuat paasissutissiivoq.

Inatsisiliortuni aqqaneq-marluk marlunnik sinittarfilimmi, arfinillillu ataatsimik sinittarfilimmi najugaqarput.

- Ilaasortat ataatsimiigiarnerminni ilaquttaminnik ilaqartut najugaqarfimmi pingasunik initalimmi najugaqarsinnaatitaapput. Ilaasortat Inatsisartut ataatsimiinnerannut ukiumut ataasiarlutik ilaquttaminnik ilaqarsinnaatitaapput, siulittaasoqarfik allappoq.

Inatsisartunut inissanik sanatitsinissaq

Ilaasortat ineqartinnerannut aningaasanut inatsimmi 4 million koruunit ukioq mannamut aningaasaliissutaapput.

Inatsisartut ilassutitut aningaaasaliissuteqarnikkut Inatsisartunut ilaasortanut inissianik 25-nik sananissamik 2019-imi aalajangerput. Tamanikkut ukiuni 30-ni ukiumut 3 million koruuninik akeqassangatinneqarpoq.

Inatsisartunut inissiat 25-t sanaartorneqarnissaat marloriarluni suliariumannittussarsiunneqarnikuugaluarpoq, neqeroortulli neqeroorutaat Illuut A/S-ip

isumaa naapertorlugu qaffasippallaartarmata sanaartortussamik suli nassaartoqanngilaq.

Illuut A/S KNR-imut ilisimatitsivoq, suliariumannittussarsiuussinerit pingajuat, sapaatit akunneranni matumani saqqummiunneqassasoq.