Ukiaanerani aavarneq ullumikkut taamaatinneqartussaavoq
Tassami inatsisit naapertorlugit pisanik nalunaarsuiffiit aavarnerup naaneraniit sapaatip akunneri marluk qaangiutsinnagit utertereerneqarsimassapput, tassa kingusinnerpaamik oktobarip 29-anni.
Immersugassat taakkuninnga paasissutissiisut pingaarutillit Pinngortitaleriffimmit pissarsiarineqartarput, taakkulu tuttut pillugit Naalakkersuisunut uumasuseqartulerisut siunnersuisarnerannut tunuliaquseeqataasarput.
Uumassuseqartulerisulli anersaaruluutissaqarput. Aavartartummi immersuinissamut immersukkaminnillu nassitsinissamut piumassuseqanngippallaaqaat. Aamma naak
Nalunaarsuiffiit - pisanut nalunaarsuiffiit aamma immikkut ittumik nalunaarsuiffiit - tuttunniarnissamik akuersissummik tunineqarnermut ilaagaluartut.
Nuup Sisimiullu aqutsivianni 2011-mi 2012-imilu immersugassat nassiunneqartartut ikileriarsimaqisut, Pinngortitaleriffimmit ilisimatitsissutigineqarpoq, tassami immersugassat Pinngortitaleriffimmut nassiunneqartussat 20 procentiinnaat tiguneqarsimagamik. Pinngortitaleriffiup tuttoqatigiiaanut immikkoortitaartunut ilisimanninnera siunnersuinermi tunngaviusarpoq. Massakkut nalunaarsuisarneq tunngavigigaanni tuttut pisarineqarsimasut amerlanerpaartaasa suiaassusiat, qanoq utoqqaatiginerat nerisaallu pillugit paasissutissat pingaarutillit taamaalillutik nalunaarsorneqanngitsoortarput.
Taamaattumik Pinngortitaleriffiup aamma Piniarnermut siunnersuisoqatigiit, erseqqissarpaat pisat, uumasullu pissatat annaasallu nalunaarutigineqassammata.
Taamaattumik immersugassat kommunerisamut kingusinnerpaamik oktobarip 29-anni nassiunnissaaat eqqaamaqquneqarpoq. Immersukkammi tunngavigalugit pisassiinissamut innersuussisoqartarmat.
