Ukaleq Slettemarkip nunarsuarmi pissartanngorniuunnissamut piumasaqaatit naammassigai
Inersimasut unammiuaarnernut peqataasartut 24-nik ukioqarput utoqqaanerullutilluunniit, inuusunnerilli aamma peqataasinnaallutik. Ukaleq Slettemark nukarlersaavoq, nukarlersap tullia 19-inik ukioqarluni.
Sisoraaserluni ooqattaasartartoq ingerlalluarpoq. Ingerlaarfissaq 7,5 kilometerinik isorartussuseqarpoq, marloriarlunilu ooqattaasartoqartussaalluni. Naak anorlilaaraluartoq Ukaleq Slettemark nalalluni ooqattaasarnermi ataatsimik uniuivoq, nikorfallunilu ooqattaasarnermi ataatsimik uniuilluni.
Taassuma ajugaasumit, 27-nik ukiulimmit Ingelia Anderssonimit, ataatsimut isigalugu minutsinik pingasunik sekundinillu 19-inik kigaannerulluni unammineq naammassivaa.
AAMMA ATUARUK Ukaleq Slettemark Norges Cuppimi ajugaasoq
Ukaleq Slettemarkip inersimasut nunarsuarmi pissartanngorniunnernut anngunnissaannut piumasaqaatit taamaasilluni naammassivai, nunarsuarmili pissartanngorniunnissamut peqataanissani pilersaarutiginagu. Juullinngitsiarnerani IBU Junior Cupimut peqataanissani aallutissavaa, Norgemilu pissartanngorniunnerit, aappaagu marsimi pisussat peqataaffigissallugit, soorlu aamma juniorit februaarip aallartisimalaarnerani nunarsuarmi pissartanngorniunnissaannut aamma peqataassalluni.
Ukaleq Slettemarkip 2022-mi OL-ertoqarnissaanut anngussinnaanissaa taamaasilluni aamma periarfissanngorsinnaavoq.
AAMMA ATUARUK Ukaleq har en stor fremtid internationalt